"Vernyi Kapital" "Ádildik jáne Órkendeý" qorymen 31 mediaholding boiynsha kelisimge otyrdy. Soǵan sáikes, quramyna "31 arna" teleradiokompaniiasy men Informburo.kz. aqparattyq portaly kiretin 31 mediaholdingtiń menshik iesi aýysty. Osylaisha Qazaqstandaǵy bai adamdardyń biri - Bolat Ótemuratovqa tiesili mediaholding "Ádildik jáne órkendeý" qoǵamdyq qorynyń qolyna ótti, al Qazaqstanda alǵash ret ÚEU mediaktiv iesi boldy, dep jazady Dalanews.kz.
Aita ketsek, "Vernyi Kapital" – Qazaqstandaǵy tikelei investitsiialarǵa mamandanǵan iri toptardyń biri ári Bolat Ótemuratovtyń aktivterin de basqarady.
"Bizdiń tájiribeli menedjerlerimizdiń komandasy óz salalarynyń kóshbasshylary bolyp tabylatyn strategiialyq seriktestermen birlese otyryp, aktivterdi elimizde jáne shetelde damytady. 2023 jyly "31" mediaholding quramynan osy jobada seriktesimiz bolǵan "STS Media" kompaniiasy shyqqannan keiin biz osy aktivti satyp alyp, onyń odan ári damýyn qamtamasyz ete alatyn uiymdy izdedik. Biz basshylyǵynda tájiribeli mediamenedjerleri bar "Ádildik jáne Órkendeý" qoǵamdyq qorymen kelisim jasasqanymyzǵa qýanyshtymyz. Telearna men aqparattyq portal úshin jańa ósý kezeńi bastalatynyna meniń kúmánim joq" – dedi "Vernyi Kapital" kompaniialar tobynyń bas direktory Aidan Aqanov.
Qoǵamdyq qor "31" mediaholdingti óz qundylyqtary negizinde adamdardy biriktirýdiń qosymsha múmkindigi retinde qarastyratyndaryn aitady. Al qordyń bas direktory Dana Rysmuhamedova kóptegen jyldar boiy "31 arnada" jumys istep kelgen eken.
"Biz "31 arna" aýditoriiasyn baǵalaimyz, ony milliondaǵan qazaqstandyqtar jaqsy kóredi jáne tamashalaidy. Bizdiń maqsatymyz – ony odan ári tanymal, qyzyqty jáne suranysqa ie etý. Telearnanyń damýy demokratiialandyrý, ashyqtyq jáne kásibilik qaǵidattarynda jalǵasady", – dep túsindirdi qoǵamdyq qordyń direktory ári jýrnalist Dana Rysmuhamedova.
Aita ketsek, Bolat Ótemuratov – qazaq oligrahtarynyń biri, "Vernyi kapital" investitsiialyq tobynyń basqarýyndaǵy jobalardyń negizgi investory jáne ataýly qaiyrymdylyq qorynyń qyzmetine jetekshilik etedi. Sondai-aq ol Qazaqstan tennis federatsiiasynyń prezidenti jáne Halyqaralyq tennis federatsiiasynyń (International Tennis Federation) vitse-prezidenti bolyp tabylady. Onyń esimi ATF bank, Temirbank, Alians bank, Kassa Nova, ForteBank ataýlarymen qatar jii atalady.
2023 jyly Forbes nusqasy boiynsha onyń dáýleti 2,7 mlrd dollarǵa baǵalandy. Ótemuratov ForteBank aktsiialarynyń 83,41%-yna ie. Sondai-aq KaR-Tel (Qazaqstandaǵy Beeline operatory), altyn óndirýshi RG Gold kompaniialary, Astana men Venadaǵy Ritz-Carlton qonaq úileri, Máskeýdegi The Carlton, Rixos Borovoe kompaniiasy aktsiialarynda da onyń úlesi bar.
