Jambyl oblysynyń bas prokýrory Nurǵalym Ábdirov Eldos Qospaevtyń qylmystyq toby elden qalaisha zańsyz qashyp ketkenin aitty, - dep habarlaidy Dalanews.kz.
Nurǵalym Ábdirov Eldos Qospaevtyń qylmystyq toby elden shekaradaǵy salǵyrttyq saldarynan qashyp ketkenin aitady.
"Qordaidaǵy tártipsizdikter kezinde memlekettik organdardyń jumysy durys emes ekeni anyqtaldy. Onyń ishinde, memlekettik shekaranyń senimsiz bolýy da bar. Shekara qyzmetin baqylaý bizdiń quzyrymyzdaǵy nárse emes. Biraq bizdiń oblysymyz shekarada turǵandyqtan shekara qaýipsizdigi máseleleri bizdiń baqylaýymyzsyz qalmaidy. Bul jumysqa quqyq qorǵaý organdary ǵana emes, jergilikti atqarýshy organdar da tartylady.
(...)
Sońǵy jyldary Qazaqstandy Eýropaǵa ótý úshin Ońtústik Aziia azamattarynyń (Pákistan, Nepal, Bangladesh, Aýǵanstan) tranzittik el retinde paidalaný jaǵdailary jiilep ketti. Qazir biz qylmystyq elementterdi qoldana alatyn shekaranyń tar jáne álsiz jerlerin alyp tastaýmen ainalysamyz", - deidi Ábdirov Orda.kz-ke bergen suhbatynda.
Eske salaiyq, Eldos Qospaevqa qatysty is boiynsha tergeý aiaqtalýǵa jaqyn. Bul týraly búgin Májiliste Qarjylyq monitoring agenttigi tóraǵasynyń orynbasary Jeńis Elemesov málimdedi.
Elemesovtiń aitýynsha, qazir 13 kúdiktiniń advokattary qylmystyq is materialdarymen tanysyp jatyr.
"Másele mynada, zattai dálelderdi eseptemegende ol jerde 508 tom bar. Salmaǵy segiz terabait bolatyn videolar men aýdiojazbalar bar. Jumys kólemi óte úlken jáne 13 kúdikti bar. Sonymen qatar, olardyń árqaisynda advokattar bar, barlyǵy tanysýy kerek. Protsess qalai aiaqtalady, solai isti sotqa jiberemiz", - dedi Jeńis Elemesov.
Buǵan deiin Ulttyq qaýipsizdik komiteti bylaiǵy ortada Bolat Nazarbaevtyń senimdi ókili sanalyp kelgen Eldos Qospaev bastaǵan qylmystyq toptyń 7 múshesin Soltústik Kiprden Qazaqstanǵa jetkizgenin málimdegen edi. Bul operatsiia byltyr 6 qyrkúiekte júzege asyryldy.
Bul topqa QR Qarjylyq monitoringi agenttigi reiderlik jasady, uiymdasqan qylmystyq top qurdy jáne oǵan qatysty degen kúdikpen halyqaralyq izdeý jariialaǵan bolatyn.
