Almaty oblysynyń ákimdigi marqum Bolat Nazarbaevqa tiesili bolǵan taǵy bir iri saýda nysanyn memleket menshigine qaitarýǵa kiristi, dep habarlaidy Dalanews.kz Todayinfo.kz saityna siltep.
Qazir Qarasai aýdanyndaǵy «Barys» bazarynyń 36 gektar aýmaǵyn tolyq iemdený úshin sot protsesteri júrip jatyr.
Uzaq jyldar boiy Nazarbaevtar áýletiniń baqylaýynda bolǵan bazar aýmaǵynda buryn avtokólik saýdasy qyzǵan. Endi jergilikti bilik bul aýmaqty ónerkásiptik maqsatqa paidalanýdy kózdep otyr.
Oblys ákimi Marat Sultanǵazievtiń aitýynsha, bazardyń aýmaǵy birneshe adamǵa jekeshelenip ketken. Qazirgi kezde sol ýchaskelerdi memleketke qaitarý úshin daýly sot isteri qaralyp jatyr.
"Avtokólik bazary tiimdi jerde ornalasqan, biraq onyń ieleri birneshe adam. Biz sottasyp jatyrmyz. Eger sot bizdi qoldap, 36 gektardan astam jer memleketke ótse, onda bul aýmaqta ónerkásiptik-indýstriialyq aimaq quramyz. Iaǵni, burynǵy avtonaryqtyń ornyna óndiris oryndary shoǵyrlanatyn bolady. Túrli usynystar boldy, biraq biz jumys oryndaryn qurýdy kózdep, óndiris baǵytyn tańdadyq. Óitkeni bul óńirde halyq tyǵyz ornalasqan", – dedi oblys ákimi.
Aita keteiik, «Barys» bazary Almaty Bishkek tas jolynyń boiynda ornalasqan. Buǵan deiin onyń bir bóligi memleket menshigine ótken, degenmen bazar jumysy áli toqtaǵan joq.
