Osydan keiin jalǵandy jalpaǵynan basqan Bókeńnen áne-mine aiyrylyp qalardai kúi keshkenimizdi jasyryp qaitemiz?
Belgili jýrnalist Ibrash Núsipbaev Bolat Nazarbaevtyń densaýlyǵyna qatysty aqparattarǵa kúdikpen qaraitynyn ashyp aitty dep habarlaidy Dalanews.kz.
Bolat Nazarbaevtyń densaýlyǵy týraly aqparattardyń kóptep shyǵýyna qatysty jýrnalistiń óz boljamy bar.
Osydan birshama ýaqyt buryn "Saliqaly urpaq" qoǵamdyq qorynyń jetekshileri Tuńǵysh Prezident Nursultan Nazarbaevtyń inisi Bolat Nazarbaev uzaq ýaqyt Germaniiada em qabyldap, qiyn kezeńdi bastan keship jatqanyn habarlaǵan.
Qordyń málimetinshe, ótken jyldyń jeltoqsanynda Bolat Nazarbaev shetelde em alyp, keiin dárigerlerdiń baqylaýymen elge jetkizilgen. Sodan beri Bókeń júrip-turýdan qalyp, tósek tartyp jatsa kerek.
"Saliqaly urpaq" qorynyń ókilderi Bolat Nazarbaev ólim men ómirdiń arasynda jatqanda óziniń biznes qurylymdaryn baqylamaǵanyn, dúnie-múlkine ainalasyndaǵylar bas-kóz bolǵanyn málimdep úlgerdi.
Alaida jýrnalist Ibrash Núsipbaev Bolat Nazarbaevtyń kópten beri tósek tartyp jatqanyna senbeidi.
"Saliqaly urpaq" qorynyń málimetine sensek, Qańtar oqiǵasy oryn almai turyp Bókeńniń densaýlyǵy kúrt nasharlap, janymen qaiǵy bolyp ketken.
Bul rette áriptesimiz Qyrǵyzstannyń shekara qyzmetiniń 2022 jyldyń 6 qańtarynda tańǵy saǵat 05:30 shamasynda Bókeńniń "Aq jol" baqylaý-ótkizý pýnktinen óz aiaǵymen ótip, 7 qańtarda Bishkek áýejaiy arqyly Dýbaiǵa ushyp ketkeni jaiyndaǵy málimetti alǵa tartady.
Bolat Nazarbaevtyń dál sol kúni Dýbaidy betke alǵanyn Flightradar24 servisi de rastaidy.
Osy jaittardy esepke alǵan jýrnalist "Bolat Nazarbaev uzaq ýaqyttan beri tósek tartyp, aýyryp jatty degenge sený qiyn" degen pikirde.
Iá, Qandy qańtar kezinde Bolat Nazarbaev kólikpen qyrǵyzǵa qarai qashqany jaiynda aqparat taraǵan edi.
Osy rette 2021 jyldyń jeltoqsanynda dárigerler baqylaýymen elge jetkizilgen Bókeń "2022 jyldyń 6-shy qańtarynda kólikke otyryp, qyrǵyz asyp, Dýbaiǵa ushatyndai kúsh-jigerdi qaidan aldy?" degen zańdy suraq týyndaidy.
Bizdińshe, "Saliqaly urpaq" qorynyń taratqan aqparatynan góri Qyrǵyzstannyń shekara qyzmeti men Flightradar24 servisiniń málimeti shyndyqqa janasady.
Osy rette "Saliqaly urpaq" qory men Bolattyń otbasynyń Nazarbaevty uzaq ýaqyttan beri tósek tartyp jatqan "tiri ólik" retinde kórsetýge nelikten árekettenip jatqany kópshilikti qyzyqtyrary anyq.
Jýrnalist Ibrash Núsipbaev Bolat Nazarbaevtyń qory óziniń qojaiyny jaiynda shyndyqqa janaspaityn aqparatty taratyp, Bókeńdi Qańtar oqiǵasyna qatysy joq, sýdan taza, sútten aq adam retinde kórsetýge kúsh salyp jatqanyn alǵa tartypty.
Mundai jaǵdaida dimkás adamnyń dúnie-múlkin tárkileý de adamgershilikke jatpaityny anyq.
Biraq Qandy qańtarda Nazarbaevtyń qolynan bilik sýsyp shyǵyp bara jatqanda "jeke armiiasy" bar Bókeńniń tynysh jatýy múmkin be? Árine múmkin emes! Bókeńniń soiylyn soǵyp júrgen jigitterdiń sol kezde barrikadanyń qai jaǵynda bolǵanyn kimniń bolsa da ishi sezeri anyq.
Qańtar oqiǵasy kezinde Bolat Nazarbaev en jailaityn Almaty men Almaty oblysynda qandai qyrǵyn bolǵanyn bilemiz.
Jýrnalist Ibrash Núsipbaev osy jaittardy basshylyqqa alyp, Bolat Nazarbaev qatty naýqas adamnyń keipine enip, memleketke opasyzdyq jasaýshylardyń sapynan sytylyp shyǵýdy kózdep otyrýy múmkin dep topshylapty.
Gúlmira Bolatqyzy «Ekspress K.» basylymyna bergen suhbatynda ákesiniń 2015 jyly búirektiń sozylmaly obyryna shaldyqqanyn, Izrail aýrýhanasynda em alyp, bir búiregin aldyrǵan, donor kómegine júgingenin aitypty.
Sol kezden bastap klinikalyq ólim jaǵdaiyna túsken soń, barlyq biznesten bas tartyp, tek densaýlyǵyn kútýmen bolǵan. Qazir Bolat Nazarbaev sóilei almaidy.
«Oǵan sebep: 2021 jyldan beri kómei obyrymen aýyrady» deidi Gúlmira Bolatqyzy. Al buǵan sizder senesizder me?
...
Al Arasha.kz portalyna pikir bildirgen sarapshy Qazybek Beisebaevtyń aitýynsha Bolat Nazarbaevtyń aýyr halde jatqan videosyn ádeii taratyp jatyr.
– Naqtyraq aitsam, halyqtyń aiaýshylyǵyn týdyrý arqyly «Bolat Nazarbaevty keshire salaiyq» degen pikir qalyptastyrýda. Al biz qoǵam retinde onyń zańsyz is árketterine baǵa berilýin talap etýimiz kerek. Bilik «halyqty aldai salamyz» dep ábden úirenip alǵan. Al biz olarǵa naqty jaýap ber dep talap etýimiz kerek, – deidi Beisebaev.
«Bolat Nazarbaev qandai jaǵdaida bolsa da jaýapqa tartylýy kerek. Máselen qylmysker bir adamdy óltirgen bolsa, biz ony keshirmeimiz ǵoi. Qoǵamda «Bolat Nazarbaev reiderlik shabýyl jasady» degen ár túrli alypqashpa áńgime aitylady. Oǵan jaýap berilý kerek.
Ókinishke qarai bizdiń bilik qylmystyq is qozǵamaidy. Ne bolmasa bilik «Bolat Nazarbaev móldir bulaq sekildi tap taza» dep ashyq aitýy kerek. Olai aitpaidy. Tek qana «janyndaǵy adamdar qylmys jasady» dep aitylady. Qasyndaǵy adamdar eshqandai buiryqsyz áreket etti me? Bizde osyndai túsiniksiz jaǵdai kóp...», – deidi sarapshy.
