Kúndiz opozısıa, túnde bıliktiń «beshirinen» qalmaıtyn Shrektiń Fıonasyndaı qoldan jasalǵan keıipker boldy emes pe?
Ábilov kimniń qoldaýymen saıasatqa aralaspaq?
Sol Bókeńnen sońǵy jyldary kóz jazyp qalǵandaı bolyp edik. Sóıtsek ol bar eken. Qańtar oqıǵasynan keıin saıasattyń alańyna toıdan qur qalǵan baladaı jele jortyp jetti. «Bizdiń tańdaý» degen saıası partıa quratynyn da aıtyp, aıdy aspannan shyǵardy.
Bul joly Bókeńe Nazarbaev tapsyrma bermegeni anyq.
«Qańtar oqıǵasynyń» aldynda Nyǵmatýlındermen qushaqtasyp, arqa-jarqa bolyp júrgenin áleýmettik jeliden kórip qalǵanbyz.
Soǵan qaraǵanda osy joly Bókeń Nyǵmatýlınderdiń demeýimen saıasatqa aralasýdy kózdep otyr.
Saıası mansabyn «Otan» partıasynan bastap, depýtat bolyp keıinnen aıaq astynan opozısıaǵa ótip ketken Bolat Ábilovtiń syryn kópshilik jaqsy biledi.
Bolat Ábilov kim?..
Qalaǵan ýaqytynda saıasatpen aınalysyp, qalaǵan ýaqytynda saıasattan kete salatyn mundaı adamǵa senýge bola ma?
Jaqtastary qyzyl jalaýdy kótergende oıynǵa aralasatyn, olıgarhıalyq toptyń jaldamaly jampozy ma? Bul suraqtarǵa jaýap bermes buryn, onyń ómir jolyna az-kem kóz júgirtsek.
...
Bolat Ábilov kezinde Nursultan Nazarbaevtyń shtattan tys kóp keńesshilerinen biri boldy. Bul qyzmette júrgende Bókeńniń Nurekeńe qandaı keńester bergenin bilmeımiz.
Budan keıin «Otan» partıasynyń saıası keńesiniń múshesi bolyp, artynsha Májilis depýtaty boldy. Sol kezde Bókeń Májilistiń skameıkasynda otyryp, halyqqa kásipkerlerdiń múddesin qorǵaıtyn saıasatker retinde tanylýǵa tyrysty.
Sol jyldary Nazarbaevpen birge syrt elderge birge saparlap, Elbasynyń qasynan qalmaıtyn-dy.
Bolat Ábilovtyń Sara Nazarbaevanyń jaqyn inileriniń biri ekeni, ol óziniń otbasyna jaqyndyǵyn paıdalanyp maıly jiliktiń basyn ustaǵany týraly áńgimeler jeldeı esken edi.
Biraq Bókeń bárine barlyq aktıvterine óz kúshimen qol jetkizgenin birneshe ret qaıtalap aıtyp, aqtalǵandaı bolǵan edi.
Býtá qalaı baıydy?
Bókeń elimizdegi iri kásiporyndardy jekeshelendirý arqyly baıyǵan olıgarhtardyń biri. Toqsanynshy jyldary Bolat Ábilov áıgili Qaraǵandy metalýrgıa kombınatyn baýyryna basqanyn da bilemiz. Keıinnen áıgili kásiporyn tegi úndilik mıllıarder Lakshmı Mıttaldyń ıeligine ótti.
Qaraǵandy metalýrgıa kombınaty Lakshmıdiń qol astyna ótkennen keıin alyp kásiporyn jandanyp ketpese de, áýpirimdep jumys isteýin toqtatpady.
Lakshmı Mıttal Eýropada dál osyndaı alyp kásiporyndardyń jumysyn jandandyrǵan bilikti maman ekenin bilemiz. Biraq Qaraǵandydaǵy kombınatta eski qurylǵylarmen ken qazǵandy jón sanaıtynyn túsine almadyq. Jylda bolmasa da jer asty kenishterinde jarylys bolyp, kenshilerdiń qaza tabýy ádetke aınalǵany jasyryp qaıtemiz.
Bolat Ábilov bolsa alyp kombınattan aıyrylyp qalǵannan keıin atalǵan kásiporyndy Nazarbaev ózine bermegenin jyrdaı qylyp talaı ret áńgime aıtqanyn bilemiz. Bergende ne bolar edi?.. Onyń elestetýdiń ózi qıyn.
Maınıng fermalar paıdanyń kózi
Qosh delik, sońǵy ýaqyttary Bolat Ábilov jerlesi Nyǵmatýlındermen tonnyń ishki baýyndaı aralasyp, birlesip bıznes júrgizetini jaıly áńgimeni qulaǵymyz shalyp qalady.
Bókeń Nurlan men Erlan Nyǵmatýlındermen bala kezde aýlada birge dop teýip óskenderin aıtyp, al bıznes baılanystary jaıynda jaq ashqan emes.
Biletinderdiń aıtýynsha, Bókeń Nyǵmatýlındermen birge Qazaqstan damý bankinen feroqorytpalar óndirisin qurý úshin nesıe alyp, qomaqty qarjyny maınıng fermalaryna salyp jibergen. Qańtar oqıǵasynan keıin bul oqıǵa sý betine kilkip shyqqan belgili.
Bókeń Nyǵmatýlındermen birge feroqorytpalar zaýytyn salýdy jeleý etip, arzan energıany maınıng fermalarǵa erkin paıdalanǵany anyq. Osylaısha eski dostardyń feroqorytpa zaýytyn salamyz degen jobasy qaǵaz kúıinde qalǵan.
Esesine «Saryarqa» erkin ekonomıkalyq aımaǵynda Nyǵmatýlınder men Ábilovke tıesili maınıng fermalar jańbyrdan keıingi sańyraýqulaqtaı paıda bolǵanyn jurt jaqsy biledi.
Keıbir dereke kózderinshe maınıng fermalar olarǵa aı saıyn 500 myń dollarǵa deıin paıda ákelgen. Osylaısha eski dostar saýsaq ushyn qımyldatpaı mıllıondaǵan dollar tapqan.
Memlekettik bankti saýyn sıyrǵa aınaldyrǵandar kim?
Qańtar oqıǵasynan keıin Qazaqstan damý banki áldekimderdiń jeke jobalaryn qarjylandyratyn bankke aınalyp ketkeni jaıynda syn aıtylǵan bolatyn. Baıqaǵan bolarsyzdar, Bókeń bala kezdegi dostarymen birge Qazaqstan damý bankin saýyn sıyrǵa aınaldyrǵan beldi toptyń biri.
Bókeń opozısıada bir shepte bolǵan áriptesi Oraz Jandosovpen birge Almaty oblysynda kún kózinen elektr qýatyn óndiretin stansıa salǵanyn da bilemiz.
Uzyn qulaqtan estýimizshe, bul jobaǵa qajetti qarjyny da Qazaqstan damý bankinen alǵan desedi. Osylaısha Bókeń Qazaqstandaǵy jasyl ekonomıkany damytýǵa da óz úlesin qosyp tastapty.
İz jasyrý
Búginde Bókeń bir ǵana Qazaqstan damý bankiniń aınalasyndaǵy jobalarynyń izin jasyrý úshin partıa quryp, saıasatpen aınalysýdy jón sanaǵandaı.
Bolat Ábilovtyń saıası partıa quryp, dúrmekke aralasýdaǵy maqsaty osy bolýy múmkin.
30 jyl boıy Nazarbaevtyń saıasatyna opozısıanyń dekorasıasyn jasaǵan Bókeń halyq aldyndaǵy bet-beınesin saqtaý úshin osyndaı qadamǵa barýy yqtımal.
Erteńgi kúni Bókeńniń Nyǵmatýlındermen birge Qazaqstan damý bankin saýyn sıyrǵa aınaldyrǵan áreketi áshkere bolyp jatsa, «el múddesi úshin partıa qurǵan opozısıalyq saıasatkerdi bılik qurbandyqqa shalyp jatyr» dep baıbalam salýy da ábden múmkin. Bul degenińiz tamasha argýment emes pe?
Sondyqtan aldaǵy ýaqytta Bókeń aıypty bolyp, zań aldynda jaýap berýine týra kelgende ózin saıasattyń qurbany sanap aıǵaı-súreńge bassa senip qalmańyzdar.
Derekkóz: @nursolovej telegram arnasy
