كۇندىز وپپوزيسيا، تۇندە بيلىكتىڭ «بەشىرىنەن» قالمايتىن شرەكتىڭ فيوناسىنداي قولدان جاسالعان كەيىپكەر بولدى ەمەس پە؟
ءابىلوۆ كىمنىڭ قولداۋىمەن ساياساتقا ارالاسپاق؟
سول بوكەڭنەن سوڭعى جىلدارى كوز جازىپ قالعانداي بولىپ ەدىك. سويتسەك ول بار ەكەن. قاڭتار وقيعاسىنان كەيىن ساياساتتىڭ الاڭىنا تويدان قۇر قالعان بالاداي جەلە جورتىپ جەتتى. «ءبىزدىڭ تاڭداۋ» دەگەن ساياسي پارتيا قۇراتىنىن دا ايتىپ، ايدى اسپاننان شىعاردى.
بۇل جولى بوكەڭە نازاربايەۆ تاپسىرما بەرمەگەنى انىق.
«قاڭتار وقيعاسىنىڭ» الدىندا نىعماتۋليندەرمەن قۇشاقتاسىپ، ارقا-جارقا بولىپ جۇرگەنىن الەۋمەتتىك جەلىدەن كورىپ قالعانبىز.
سوعان قاراعاندا وسى جولى بوكەڭ نىعماتۋليندەردىڭ دەمەۋىمەن ساياساتقا ارالاسۋدى كوزدەپ وتىر.
ساياسي مانسابىن «وتان» پارتياسىنان باستاپ، دەپۋتات بولىپ كەيىننەن اياق استىنان وپپوزيسياعا ءوتىپ كەتكەن بولات ءابىلوۆتىڭ سىرىن كوپشىلىك جاقسى بىلەدى.
بولات ءابىلوۆ كىم؟..
قالاعان ۋاقىتىندا ساياساتپەن اينالىسىپ، قالاعان ۋاقىتىندا ساياساتتان كەتە سالاتىن مۇنداي ادامعا سەنۋگە بولا ما؟
جاقتاستارى قىزىل جالاۋدى كوتەرگەندە ويىنعا ارالاساتىن، وليگارحيالىق توپتىڭ جالدامالى جامپوزى ما؟ بۇل سۇراقتارعا جاۋاپ بەرمەس بۇرىن، ونىڭ ءومىر جولىنا از-كەم كوز جۇگىرتسەك.
...
بولات ءابىلوۆ كەزىندە نۇرسۇلتان نازاربايەۆتىڭ شتاتتان تىس كوپ كەڭەسشىلەرىنەن ءبىرى بولدى. بۇل قىزمەتتە جۇرگەندە بوكەڭنىڭ نۇرەكەڭە قانداي كەڭەستەر بەرگەنىن بىلمەيمىز.
بۇدان كەيىن «وتان» پارتياسىنىڭ ساياسي كەڭەسىنىڭ مۇشەسى بولىپ، ارتىنشا ءماجىلىس دەپۋتاتى بولدى. سول كەزدە بوكەڭ ءماجىلىستىڭ سكامەيكاسىندا وتىرىپ، حالىققا كاسىپكەرلەردىڭ مۇددەسىن قورعايتىن ساياساتكەر رەتىندە تانىلۋعا تىرىستى.
سول جىلدارى نازاربايەۆپەن بىرگە سىرت ەلدەرگە بىرگە ساپارلاپ، ەلباسىنىڭ قاسىنان قالمايتىن-دى.
بولات ءابىلوۆتىڭ سارا نازاربايەۆانىڭ جاقىن ىنىلەرىنىڭ ءبىرى ەكەنى، ول ءوزىنىڭ وتباسىنا جاقىندىعىن پايدالانىپ مايلى جىلىكتىڭ باسىن ۇستاعانى تۋرالى اڭگىمەلەر جەلدەي ەسكەن ەدى.
ءبىراق بوكەڭ بارىنە بارلىق اكتيۆتەرىنە ءوز كۇشىمەن قول جەتكىزگەنىن بىرنەشە رەت قايتالاپ ايتىپ، اقتالعانداي بولعان ەدى.
بۋتيا قالاي بايىدى؟
بوكەڭ ەلىمىزدەگى ءىرى كاسىپورىنداردى جەكەشەلەندىرۋ ارقىلى بايىعان وليگارحتاردىڭ ءبىرى. توقسانىنشى جىلدارى بولات ءابىلوۆ ايگىلى قاراعاندى مەتاللۋرگيا كومبيناتىن باۋىرىنا باسقانىن دا بىلەمىز. كەيىننەن ايگىلى كاسىپورىن تەگى ۇندىلىك ميللياردەر لاكشمي ميتتالدىڭ يەلىگىنە ءوتتى.
قاراعاندى مەتاللۋرگيا كومبيناتى لاكشميدىڭ قول استىنا وتكەننەن كەيىن الىپ كاسىپورىن جاندانىپ كەتپەسە دە، اۋپىرىمدەپ جۇمىس ىستەۋىن توقتاتپادى.
لاكشمي ميتتال ەۋروپادا ءدال وسىنداي الىپ كاسىپورىنداردىڭ جۇمىسىن جانداندىرعان بىلىكتى مامان ەكەنىن بىلەمىز. ءبىراق قاراعاندىداعى كومبيناتتا ەسكى قۇرىلعىلارمەن كەن قازعاندى ءجون سانايتىنىن تۇسىنە المادىق. جىلدا بولماسا دا جەر استى كەنىشتەرىندە جارىلىس بولىپ، كەنشىلەردىڭ قازا تابۋى ادەتكە اينالعانى جاسىرىپ قايتەمىز.
بولات ءابىلوۆ بولسا الىپ كومبيناتتان ايىرىلىپ قالعاننان كەيىن اتالعان كاسىپورىندى نازاربايەۆ وزىنە بەرمەگەنىن جىرداي قىلىپ تالاي رەت اڭگىمە ايتقانىن بىلەمىز. بەرگەندە نە بولار ەدى؟.. ونىڭ ەلەستەتۋدىڭ ءوزى قيىن.
ماينينگ فەرمالار پايدانىڭ كوزى
قوش دەلىك، سوڭعى ۋاقىتتارى بولات ءابىلوۆ جەرلەسى نىعماتۋليندەرمەن توننىڭ ىشكى باۋىنداي ارالاسىپ، بىرلەسىپ بيزنەس جۇرگىزەتىنى جايلى اڭگىمەنى قۇلاعىمىز شالىپ قالادى.
بوكەڭ نۇرلان مەن ەرلان نىعماتۋليندەرمەن بالا كەزدە اۋلادا بىرگە دوپ تەۋىپ وسكەندەرىن ايتىپ، ال بيزنەس بايلانىستارى جايىندا جاق اشقان ەمەس.
بىلەتىندەردىڭ ايتۋىنشا، بوكەڭ نىعماتۋليندەرمەن بىرگە قازاقستان دامۋ بانكىنەن فەرروقورىتپالار ءوندىرىسىن قۇرۋ ءۇشىن نەسيە الىپ، قوماقتى قارجىنى ماينينگ فەرمالارىنا سالىپ جىبەرگەن. قاڭتار وقيعاسىنان كەيىن بۇل وقيعا سۋ بەتىنە كىلكىپ شىققان بەلگىلى.
بوكەڭ نىعماتۋليندەرمەن بىرگە فەرروقورىتپالار زاۋىتىن سالۋدى جەلەۋ ەتىپ، ارزان ەنەرگيانى ماينينگ فەرمالارعا ەركىن پايدالانعانى انىق. وسىلايشا ەسكى دوستاردىڭ فەرروقورىتپا زاۋىتىن سالامىز دەگەن جوباسى قاعاز كۇيىندە قالعان.
ەسەسىنە «سارىارقا» ەركىن ەكونوميكالىق ايماعىندا نىعماتۋليندەر مەن ابىلوۆكە تيەسىلى ماينينگ فەرمالار جاڭبىردان كەيىنگى ساڭىراۋقۇلاقتاي پايدا بولعانىن جۇرت جاقسى بىلەدى.
كەيبىر دەرەكە كوزدەرىنشە ماينينگ فەرمالار ولارعا اي سايىن 500 مىڭ دوللارعا دەيىن پايدا اكەلگەن. وسىلايشا ەسكى دوستار ساۋساق ۇشىن قيمىلداتپاي ميلليونداعان دوللار تاپقان.
مەملەكەتتىك بانكتى ساۋىن سيىرعا اينالدىرعاندار كىم؟
قاڭتار وقيعاسىنان كەيىن قازاقستان دامۋ بانكى الدەكىمدەردىڭ جەكە جوبالارىن قارجىلاندىراتىن بانككە اينالىپ كەتكەنى جايىندا سىن ايتىلعان بولاتىن. بايقاعان بولارسىزدار، بوكەڭ بالا كەزدەگى دوستارىمەن بىرگە قازاقستان دامۋ بانكىن ساۋىن سيىرعا اينالدىرعان بەلدى توپتىڭ ءبىرى.
بوكەڭ وپپوزيسيادا ءبىر شەپتە بولعان ارىپتەسى وراز جاندوسوۆپەن بىرگە الماتى وبلىسىندا كۇن كوزىنەن ەلەكتر قۋاتىن وندىرەتىن ستانسيا سالعانىن دا بىلەمىز.
ۇزىن قۇلاقتان ەستۋىمىزشە، بۇل جوباعا قاجەتتى قارجىنى دا قازاقستان دامۋ بانكىنەن العان دەسەدى. وسىلايشا بوكەڭ قازاقستانداعى جاسىل ەكونوميكانى دامىتۋعا دا ءوز ۇلەسىن قوسىپ تاستاپتى.
ءىز جاسىرۋ
بۇگىندە بوكەڭ ءبىر عانا قازاقستان دامۋ بانكىنىڭ اينالاسىنداعى جوبالارىنىڭ ءىزىن جاسىرۋ ءۇشىن پارتيا قۇرىپ، ساياساتپەن اينالىسۋدى ءجون ساناعانداي.
![](/uploads/images/20240127182852425.jpg)
بولات ءابىلوۆتىڭ ساياسي پارتيا قۇرىپ، دۇرمەككە ارالاسۋداعى ماقساتى وسى بولۋى مۇمكىن.
30 جىل بويى نازاربايەۆتىڭ ساياساتىنا وپپوزيسيانىڭ دەكوراسياسىن جاساعان بوكەڭ حالىق الدىنداعى بەت-بەينەسىن ساقتاۋ ءۇشىن وسىنداي قادامعا بارۋى ىقتيمال.
ەرتەڭگى كۇنى بوكەڭنىڭ نىعماتۋليندەرمەن بىرگە قازاقستان دامۋ بانكىن ساۋىن سيىرعا اينالدىرعان ارەكەتى اشكەرە بولىپ جاتسا، «ەل مۇددەسى ءۇشىن پارتيا قۇرعان وپپوزيسيالىق ساياساتكەردى بيلىك قۇرباندىققا شالىپ جاتىر» دەپ بايبالام سالۋى دا ابدەن مۇمكىن. بۇل دەگەنىڭىز تاماشا ارگۋمەنت ەمەس پە؟
سوندىقتان الداعى ۋاقىتتا بوكەڭ ايىپتى بولىپ، زاڭ الدىندا جاۋاپ بەرۋىنە تۋرا كەلگەندە ءوزىن ساياساتتىڭ قۇربانى ساناپ ايعاي-سۇرەڭگە باسسا سەنىپ قالماڭىزدار.
دەرەككوز: @nursolovej تەلەگرام ارناسى