"BJZQ" AQ "Ulttyq qor - balalarǵa" baǵdarlamasynyń qatysýshylaryna shamamen 3,4 mln AQSh dollaryn aýdardy. Bul qarajattar, negizinen, baspana jáne oqý aqysyn tóleýge baǵyttalǵan, dep habarlaidy Dalanews.kz.
2024 jyldyń 1 qarashasyndaǵy jaǵdai boiynsha BJZQ jalpy somasy 3 364 944,63 dollarǵa 33 546 ótinishti oryndady. Onyń ishinde turǵyn úi jaǵdaiyn jaqsartý maqsatynda 1 804 601,05 dollarǵa 17 991 ótinish, bilim alý aqysyn tóleý úshin 1 560 343,58 dollar somasyna 15 555 ótinish oryndaldy.
BJZQ baspasóz qyzmetiniń málimetinshe, qarajatty turǵyn úi jaǵdailaryn jaqsartý úshin paidalanýdy qalaǵandardyń ishinde esepti kezeńde Shymkent qalasynyń, Qyzylorda oblysynyń jáne Jetisý oblysynyń turǵyndary asqan belsendilik tanytty.
Bul rette qarajatty paidalanýdyń eń tanymal qosalqy maqsattary mynalar boldy:
- odan ári jinaqtaý úshin turǵyn úi qurylys jinaq salymyndaǵy aqshasyn tolyqtyrý,
- azamattyq-quqyqtyq mámileler boiynsha menshikke turǵyn úi satyp alý,
- turǵyn úi satyp alýǵa ipotekalyq turǵyn úi qaryzyn alý úshin bastapqy jarnany engizý.
Qor málimetinshe, qarajatty bilim alý aqysyn tóleý úshin paidalanǵan eń belsendi qazaqstandyqtar taǵy da Shymkent qalasynyń, Jetisý oblysynyń jáne Almaty qalasynyń turǵyndary boldy.
Bul baǵyttaǵy eń tanymal qosalqy maqsattardyń ishinde mynalardy atap ótýge bolady:
- Qazaqstan Respýblikasynyń aýmaǵynda ornalasqan bilim berý uiymdarynyń bilim berý qyzmetterine úlestermen (árbir akademiialyq kezeń nemese oqý jyly úshin) nemese tolyq kólemde bir mezgilde (búkil oqý merzimi úshin) aqy tóleý,
- bilim berý jinaqtaý salymy týraly shart boiynsha bilim berý jinaqtaý salymyn tolyqtyrý,
- sheteldik bilim berý uiymdarynyń bilim berý qyzmetterine úlestermen (árbir akademiialyq kezeń nemese oqý jyly úshin) nemese tolyq kólemde bir ret (búkil oqý merzimi úshin) aqy tóleý.
Nysanaly jinaqtardy alýshy ózine tiesili barlyq somany da, onyń bir bóligin de paidalanýǵa quqyly. Bul rette paidalanylmaǵan somanyń qaldyǵy nysanaly jinaqtaý shotynda (NJSh) qalady.
Aita ketsek, alǵashqy nysanaly talaptar men nysanaly jinaqtar BJZQ-daǵy shottarǵa 2024 jylǵy qańtarda ár balaǵa 100,52 dollardan tústi. Balanyń nysanaly talaptarǵa qatysýshylar tizimine qosylǵany týraly aqparatty ata-analar nemese basqa da zańdy ókilder kids.enpf.kz saity arqyly balanyń JSN nómiri boiynsha teksere alady.
