Sot "QazAstyqEksportqa" qundy qaǵazdar boiynsha merzimi ótken tólemderge qatysty 2,6 mlrd teńge bereshek aqshany zeinetaqy qoryna tóleýdi mindettedi, dep habarlaidy Dalanews.kz.
Jambyl oblysynyń mamandandyrylǵan aýdanaralyq soty Biryńǵai jinaqtaýshy zeinetaqy qorynyń "QazAstyqEksport" holdinginen bereshek aqsha men turaqsyzdyq aiybyn óndirip alý týraly aryzyn qanaǵattandyrdy.
Is materialdaryna sáikes, "QazAstyqEksport" holdingi QR Ulttyq Bankiniń obligatsiialaryn shyǵarý sharttaryna sáikes kýpondyq syiaqyny jylyna 1 ret tólei otyryp, jyldyq 8,0% mólsherlememen kýpondyq obligatsiialar shyǵarǵan. Bul qundy qaǵazdardy BJZQ 31 mlrd teńgeden asa somaǵa satyp alǵan. Alaida 2019 jyly tamyzda kýpondyq syiaqyny esepteý jáne tóleý kestesine ózgeris engizildi, al sol jyldyń jeltoqsanynda emitenttiń obligatsiialary boiynsha defolt jariialandy.
Jaýapkerdiń bereshekti erikti túrde óteý týraly talap qoiýshynyń sotqa deiingi talaby nazardan tys qalyp, osyǵan bailanysty talap qoiýshy MAES-ke júgindi.
Jaýapker sotqa deiingi talabyn almaǵanyn aityp, óz oiybyn moiyndamady. Alaida talap qoiýshy sotqa jaýapkerge sotqa deiingi talapty joldaǵany týraly túbirtek qaǵazdy usyndy.
Sot talap qoiýdy tolyq kólemde qanaǵattandyrdy. Jaýapker 2,5 mlrd teńgeden astam mólsherdegi kýpondyq syiaqy somasyn, 94 mln teńge mólsherindegi turaqsyzdyq aiybyn jáne 77 mln teńge mólsherindegi memlekettik bajdy tóleýge mindetti.
Sheshim zańdy kúshine engen joq.
Aita ketsek, Prospekt boiynsha óz mindettemelerin oryndamaǵany úshin jaýapkerden sot tártibimen 4 jyl ishindegi kýpondyq syiaqy tóleý boiynsha bereshek óndirildi. Jaýapkerdiń talap qoiýshy aldyndaǵy beresheginiń jalpy somasy 2025 jylǵy aqpandaǵy jaǵdai boiynsha 2,5 mlrd teńgeden asty.
Buǵan deiin saitymyzda "Zeinetaqy aktivteriniń investtabysyn "jep jatqan" ne nárse nemese kim?" degen maqala jariialanǵan bolatyn.
