"Bala Jambyl" esimimen tanylǵan jas aqyn Jambyl Dúisenov jýrnalist Jylqyshybaiǵa bergen suhbatynda sońǵy jyldary ne sebepti kópshilik kózinen tasada qalǵanyn aitty, dep habarlaidy ozgeris.info.
Aqynnyń sózinshe, onyń ómirindegi eń aýyr kezeń 2020 jyly bastalǵan. Sol jyly ol ózine óte jaqyn bolǵan ápkesinen aiyrylǵan. Jambyl bul qaiǵynyń búkil otbasyna aýyr soqqy bolǵanyn jetkizdi.
"2020 jyly ómirimdi kúrt ózgertken jaǵdai boldy. Moinyma taqqan tumarymdai bolǵan jalǵyz ápkemnen, syrlasymnan, eń jaqyn adamymnan aiyrylyp qaldym. Osy jaǵdaidan keiin ózimdi tastap jiberdim. Jumystan da shyǵyp kettim. Tek úide jattym, jylai beretinmin", – dedi ol.
Jas aqyn ápkesi Qytaidan kelip, diplom jumysyn jazyp júrgen kezde kenetten qaitys bolǵanyn aitty. Onyń sózinshe, bul jaǵdaidan keiin ol áleýmettik jeliden alystap, eshkimmen aralaspai ketken.
"Ápkemniń qazasy otbasymyzǵa óte aýyr tidi. Áleýmettik jelini umyttym, eshkimmen bailanyspadym, eshkimmen aralaspadym", – dedi Bala Jambyl.
Jambyl Dúisenov ózin qaita qolǵa alýyna eń aldymen anasynyń jaǵdaiy sebep bolǵanyn aitty. Aqynnyń sózinshe, ápkesi ómirden ótkennen keiin anasy da qatty kúizelgen.
"Ózimdi qolǵa alǵan birinshi sebep – anam. Ápkem qaitqan soń anam múlde jatyp qaldy. Menimen qoshtasa beretin boldy", – dedi ol.
Aqyn buǵan deiin de ómirindegi jaqyn adamdarynan aiyrylǵanyn eske aldy. 2016 jyly ájesinen aiyrylǵanyn, al ájesi onyń tárbiesinde erekshe oryn alǵanyn aitty.
"Ómirimdegi eń jaqyn eki adam – ájem men ápkem edi. Ájemniń tárbiesimen óttim. Barlyq otbasym maǵan qarap qaldy. Ákem de jumystan shyǵyp ketken", – dedi Jambyl.
Suhbat barysynda ol ápkesiniń qazasynan keiin aýyr kúizeliske túsip, ómirden túńilgen sátteri bolǵanyn jasyrmady. Tipti ózine qol jumsamaq bolǵan kezi de bolǵanyn aitty.
"Ápkem qaitqannan keiin ózime sýitsid jasamaq bolǵanym ras. 10 jyl boiy aqyndyǵymdy da tastap kettim. Óitkeni bul ómirden kóńilim qalyp, kúder úzgen sát boldy. Biraq olai bolmaitynyn túsindim. Tek ózimdi oilap ketip qalsam, áýletim jylap qalady", – dedi ol.
