Anyǵynda, talǵam bar jerde, tańdaý bar. Tańdaý bar jerde talǵam bar. Bizde ekeýi de joq. Saiasatymyz qandai bolsa, sahnamyz da sondai eken. Ózgeshe pikir bildirgenderdi, óz jolymen júrgisi kelgenderdi kótermeidi. Bálkim, kóre almaidy.
Áitpese, Ninety One saǵan ne jazdy, Rinat? Bárin bastap bergen sen ediń. Atarǵa oq, synarǵa sóz taba almai júrgender jamyrasa ketti. Bárin bastap bergen sen ediń. Olardy kógildir qylǵan da, olardy ulttan bezdirgen de, jalpy olarǵa qarata neshe túrli jaman sóz aittyrǵan da óziń ediń Rinat.
Sonda senińshe óner degen ne? Kafedegi úsh jigittiń basyn qurap «Mýzarttyń» kóshirmelerin qurý ma? Álde qyrǵyz-ózbektiń ánderin urlap qoldan hit jasaý ma?
Baiqaisyń ba, bizde aýyrdyń ústi, jeńildiń astymen júretin ánshiler kóp. Olar tyńdarmandy oilamaidy. Ózin oilaidy. Óziniń nesibesin oilaidy. Toidy oilaidy. Toidaǵy bidi oilaidy.
Aitalyq, bizdiń talǵamymyz toi ánderin qabyldai almaidy. Qainaǵaǵa, qaryndasqa, qudashaǵa arnalǵan ánder bizdiń tańdaýymyzben sáikespeidi eken. Ne isteimiz sonda? Kimdi tyńdaimyz, Rinat aitshy?
Ninety One kimge, ne jazdy? Seniń bastap bergeniń sol jer-jerdiń bárinde «anti 91» aktsiialary ótti. Top halyq jaýyna ainaldy. Kúlkilisi Soltústik jaqta toptyń keshin ótkizýge qarsy bir top aǵa-apalarymyz mini-miting ótkizipti.
«Top qazaqqa qaýipti. Ultqa qater tóndirip otyr» depti. Kúlgenimiz-ai. Soltústikte budan basqa másele joq eken. Olardyń Ninety One-ǵa shamasy jetedi. Al Kýtýzov pen Sývorovtyń kóshelerin, Pavlodar men Petropavldyń attaryn aýystyrý qajettigin aita almaidy. Olardy Soltústiktegi tildiń taǵdyry tolǵandyrmaidy, olar úshin Ninety One qaýipti. Anyǵynda, olar Ninety One-dy ne úshin jekkóretinderin bilmeidi. Olar seniń sózderińe aldanyp qalǵan, Rinat. Sen sózdiń maiyn tamyzasyń ǵoi, óitkeni.
Sózdiń maiyn tamyzatyn adam aqsaqty tyńdai, ótirikti shyndai jetkizbeýshi me edi?
Toptyń atyn paidalanyp ózińe jarnama jasaǵandy doǵarý kerek shyǵar. Orynsyz jala, dóreki tiisý. Anyqtap kelgende, sózderińniń birde-birine dálel joq. Biraq, halyqtyń tabiǵaty sondai. Ertegige senedi, pafosqa aldanyp qalady.
Áitpese, sen jyrlaityn másele az ba? Tildi aitshy, jerdi aitshy. Qaida baramyz, qaida kelemiz? Kim edik, qandai boldyq? Osy týraly aitshy. Jurt tyńdaidy seni. Ninety One-ǵa tiiskenińdi doǵarshy. Sendei aqynǵa sóz etýge turmaityn dúniemen alysqan uiat. Joq, ras.
Ótkende osy toptyń prodiýseri Erbolattyń sózin tyńdadyq. «Maqsatym qazaq tilin trendke ainaldyrý» dedi. Qalai? Án arqyly, óner arqyly. Basqa jol joq. Basqalai úirenbeidi. Batysta «jumsaq kúsh » degen túsinik bar. Olarda bizdi solai jaýlaǵan. Endeshe bul jigitter óz jolymen júrýge, ónerin jasaýǵa mursat ber. Sen olarǵa báribir kedergi bola almaisyń…
Al FREDO
