Jiynda sóz sóilegen jazýshy Dýlat Isabekov búgingi jaǵdailar haqynda óz oilaryn ortaǵa salyp, máseleden shyǵýdyń joldaryn izdedi.
— Osyndai jinalys Qazaqstanda nege kóbeiip ketti? Uiqysy qalyń qazaq nege oiandy? «Oian, qazaq» dep ǵasyrlar boiy aityp kele jatqanda oiana almaǵan halqymyz, 1916 jylǵy ult-azattyq kóterilistiń 100 jyl tolǵan kezde «oianyp» jatyr.
Biz ádben úndemei, bilikti jaman úiretip alǵanbyz. Bári ózimizden. Memleketimiz ne istep jatsa da, «eldiń mazasyn almaiyq, tynyshtyq saqtaiyq» dep únsiz otyramyz.
Myna jerde otyrǵan azamattardyń barlyǵy – qazaqtyń qaimaqtary. Ministrlikter bir reforma jasamas buryn osy kisilerge kelip, qandai oiy bar ekenin nege bilmeidi?
Qazir nege degen suraq kóbeidi. «Jaqsylyq kórsem – ózimnen, jamandyq kórsem – ózimnen» deidi Sultanmahmut. Sol aitpaqshy búgin osyndai kúige túsip otyrsaq, oǵan aldymen aitatyn kezde úndemei qalǵan ózimiz kinálimiz.
Biz ótirikke sengen halyqpyz. «Nurqadilov ózin-ózi úsh ret atty» degenge sengen halyqpyz. Iaǵni, bilik osyndai adamnyń basyna syimaityn ótirikterdi aitý arqyly Qazaqstandy azamattar tózimdiliginiń poligonyna ainaldy. «Úsh ret atyp, ózin óltirdi» degenniń ar jaǵynda ne tur? «Bul ultqa ne aitsań da kóne beredi» degen pikir qalyptastyrý úshin jasalǵan sharýa. Tor kóilektiń bir tini ketse, qaita toqý kerek bolady. Qazirgi jaǵdaiymyz sol tor kóilektikindei bolyp tur. Endi ne isteý kerek? Oiyńdy aitaiyn dep alańǵa shyqsań, «memlekettik tóńkeris jasamaq boldy» dep alyp ketedi.
Osynyń bári bizdiń biliktegi adamdardyń oqýdy bitirgennen keiin bir de bir kitap oqymaǵandyǵynan. Evtýshenkonyń «Biliktegiler Tolstoidyń «Qajymuratyn» oqyǵanda Sheshenstanǵa soǵysýdyń qajetsiz ekenin biletin edi» degen sózi bar. Sol aitpaqshy, bizdiń bilik halyqtyń neni qalap, neni qalamaitynyn bilmei otyr.
Alda 6 shilde – Prezidentimizdiń týǵan kúni kele jatyr. Sol kúndi kóshege shyǵyp toilaiyq onda. Negizi búgingi máselege bailanysty bárimiz jinalyp, kontseptýaldi qujat daiyndaýymyz kerek, — dedi jazýshy.
Aita ketsek, jiynda qoǵam belsendileri úshtildilik reformasynyń ultty joiýǵa baǵyttalǵanyn ashyq aityp, óz qarsylyqtaryn bildirdi. Sondai-aq, Bilim ministrliginiń ókilderine qoǵam belsendisi Rýza Beisenbaiteginiń 4 jarym myńnan astam adamnyń qoly jinalǵan ashyq hatyn tapsyrdy.
Derekkóz: Ult portaly
