Almaty oblysyndaǵy Kúrti sý qoimasy mańynda sý tapshylyǵy qaýpi áli de saqtalyp otyr, dep habarlaidy dalanews.kz.
Úkimet otyrysynda Sý resýrstary jáne irrigatsiia ministri Nurjan Nurjigitov qazirgi tańda Kúrti sý qoimasyndaǵy sý kólemi 64 mln tekshe metr ekenin málimdedi. Bul ótken jylǵy kórsetkishten 38 mln tekshe metrge az.
Ministrdiń aitýynsha, sý qorynyń jalpy deńgeii salystyrmaly túrde joǵary bolǵanymen, Almaty oblysynda táýekel tolyq joiylmaǵan.
Sonymen qatar Shý-Talas basseinindegi sý qoimalarynyń tolý deńgeii 81%-dy quraidy. Alaida Qyrǵyzstan aýmaǵyndaǵy Kirov jáne Orto-Tokoi sý qoimalaryndaǵy tómen sý deńgeii alańdaýshylyq týǵyzyp otyr.
Osyǵan bailanysty 2026 jylǵa arnalǵan sý paidalaný limiti 1,2 mlrd tekshe metrden 900 mln tekshe metrge deiin qysqartylǵan.
Ministrdiń málimetinshe, Balqash-Alakól basseinindegi sý qoimalarynyń tolý deńgeii 97%-ǵa jetken. Al Qapshaǵai sý qoimasy 98%-ǵa deiin tolǵan.
2026 jylǵa bekitilgen sý paidalaný limiti Almaty oblysy úshin 2,1 mlrd tekshe metr, al Jetisý oblysy úshin 1,8 mlrd tekshe metr bolyp belgilengen.
Aral-Syrdariia basseinindegi iri sý qoimalarynyń tolýy 87%-dy qurap otyr. Bul ótken jylmen salystyrǵanda 13%-ǵa joǵary.
Shardara sý qoimasy qazirgi ýaqytta 99%-ǵa tolǵan.
Qyzylorda oblysy úshin turaqty sýarý limiti 3,2 mlrd tekshe metr kóleminde bekitilse, Túrkistan oblysyna 3,8 mlrd tekshe metr sý qarastyrylǵan.
Nurjan Nurjigitovtiń aitýynsha, qazirgi ýaqytta ońtústik óńirlerdegi ishki sý qoimalaryndaǵy jaǵdai jalpy turaqty.
«5 mamyrdaǵy jaǵdai boiynsha ońtústik óńirlerdegi sý qoimalarynda 26,2 mlrd tekshe metr sý jinalǵan. Bul ótken jyldyń osy kezeńimen salystyrǵanda 500 mln tekshe metrge kóp», — dedi ministr.
