بۇگىن الماتىداعى «استانا» قوناق ۇيىندە «قازاقتىڭ ءتىلى مەن تاريحى – ۇلتتىڭ التىن قازىعى» دەگەن تاقىرىپتا قوعامدىق تالقىلاۋ ءوتتى.

جيىندا ءسوز سويلەگەن جازۋشى دۋلات يسابەكوۆ بۇگىنگى جاعدايلار حاقىندا ءوز ويلارىن ورتاعا سالىپ، ماسەلەدەن شىعۋدىڭ جولدارىن ىزدەدى.

— وسىنداي جينالىس قازاقستاندا نەگە كوبەيىپ كەتتى؟ ۇيقىسى قالىڭ قازاق نەگە وياندى؟ «ويان، قازاق» دەپ عاسىرلار بويى ايتىپ كەلە جاتقاندا ويانا الماعان حالقىمىز، 1916 جىلعى ۇلت-ازاتتىق كوتەرىلىستىڭ  100 جىل تولعان كەزدە «ويانىپ» جاتىر.

ءبىز ادبەن ۇندەمەي، بيلىكتى جامان ۇيرەتىپ العانبىز. ءبارى وزىمىزدەن. مەملەكەتىمىز نە ىستەپ جاتسا دا، «ەلدىڭ مازاسىن المايىق، تىنىشتىق ساقتايىق» دەپ ءۇنسىز وتىرامىز.

مىنا جەردە وتىرعان ازاماتتاردىڭ بارلىعى – قازاقتىڭ قايماقتارى. مينيسترلىكتەر ءبىر رەفورما جاساماس بۇرىن وسى كىسىلەرگە كەلىپ، قانداي ويى بار ەكەنىن نەگە بىلمەيدى؟

ءقازىر نەگە دەگەن سۇراق كوبەيدى. «جاقسىلىق كورسەم – وزىمنەن، جاماندىق كورسەم – وزىمنەن» دەيدى سۇلتانماحمۇت. سول ايتپاقشى بۇگىن وسىنداي كۇيگە ءتۇسىپ وتىرساق، وعان الدىمەن ايتاتىن كەزدە ۇندەمەي قالعان ءوزىمىز كىنالىمىز.

ءبىز وتىرىككە سەنگەن حالىقپىز. «ءنۇرقادىلوۆ ءوزىن-وزى ءۇش رەت اتتى» دەگەنگە سەنگەن حالىقپىز. ياعني، بيلىك وسىنداي ادامنىڭ باسىنا سىيمايتىن وتىرىكتەردى ايتۋ ارقىلى قازاقستاندى ازاماتتار توزىمدىلىگىنىڭ پوليگونىنا اينالدى. «ءۇش رەت اتىپ، ءوزىن ءولتىردى» دەگەننىڭ ار جاعىندا نە تۇر؟ «بۇل ۇلتقا نە ايتساڭ دا كونە بەرەدى» دەگەن پىكىر قالىپتاستىرۋ ءۇشىن جاسالعان شارۋا. تور كويلەكتىڭ ءبىر ءتىنى كەتسە، قايتا توقۋ كەرەك بولادى. قازىرگى جاعدايىمىز سول تور كويلەكتىكىندەي بولىپ تۇر. ەندى نە ىستەۋ كەرەك؟ ويىڭدى ايتايىن دەپ الاڭعا شىقساڭ، «مەملەكەتتىك توڭكەرىس جاساماق بولدى» دەپ الىپ كەتەدى.

وسىنىڭ ءبارى ءبىزدىڭ بيلىكتەگى ادامداردىڭ وقۋدى بىتىرگەننەن كەيىن ءبىر دە ءبىر كىتاپ وقىماعاندىعىنان. ەۆتۋشەنكونىڭ «بيلىكتەگىلەر تولستويدىڭ «قاجىمۇراتىن» وقىعاندا شەشەنستانعا سوعىسۋدىڭ قاجەتسىز ەكەنىن بىلەتىن ەدى» دەگەن ءسوزى بار. سول ايتپاقشى، ءبىزدىڭ بيلىك حالىقتىڭ نەنى قالاپ، نەنى قالامايتىنىن بىلمەي وتىر.

الدا 6 شىلدە – پرەزيدەنتىمىزدىڭ تۋعان كۇنى كەلە جاتىر. سول كۇندى كوشەگە شىعىپ تويلايىق وندا. نەگىزى بۇگىنگى ماسەلەگە بايلانىستى ءبارىمىز جينالىپ، كونسەپتۋالدى قۇجات دايىنداۋىمىز كەرەك، — دەدى جازۋشى.

ايتا كەتسەك، جيىندا قوعام بەلسەندىلەرى ۇشتىلدىلىك رەفورماسىنىڭ ۇلتتى جويۋعا باعىتتالعانىن اشىق ايتىپ، ءوز قارسىلىقتارىن ءبىلدىردى. سونداي-اق، ءبىلىم مينيسترلىگىنىڭ وكىلدەرىنە قوعام بەلسەندىسى رۋزا بەيسەنبايتەگىنىڭ 4 جارىم مىڭنان استام ادامنىڭ قولى جينالعان اشىق حاتىن تاپسىردى.

دەرەككوز: ۇلت پورتالى