Bishkektiń Sverdlov aýdandyq soty IIM Jol qozǵalysy qaýipsizdigin qamtamasyz etý bas basqarmasynyń burynǵy inspektory Baqyt Ýrýstemovti burynǵy áielin óltirip, azaptaǵany úshin ómir boiyna bas bostandyǵynan aiyrdy. Bul týraly 17 shildede Bishkek qalalyq sotynyń baspasóz qyzmeti habarlady, dep jazady dalanews.kz.
Sot málimetinshe, Ýrýstemov Qyrǵyzstan Qylmystyq kodeksiniń "Asa qatygezdikpen adam óltirý" jáne "Balaǵa, dármensiz kúidegi nemese kinálige materialdyq ne ózge de táýeldi adamǵa qatysty azaptaý" baptary boiynsha kináli dep tanyldy.
Ómir boiyna bas bostandyǵynan aiyrý jazasynan bólek, sot sottalǵan azamattan jábirlenýshi taraptyń paidasyna moraldyq ziian úshin 1 million som óndirip alý týraly sheshim shyǵardy.
Qaiǵyly oqiǵa 2025 jylǵy 23 jeltoqsanda bolǵan. Sol kúni, týǵan kúninde Qyrǵyz ekonomikalyq ýniversitetiniń oqytýshysy Jibek Ýrýstemova atyp óltirildi.
Onyń artynda úsh uly qaldy. Olardyń ekeýi sol kezde bastaýysh synypta oqyǵan.
Bul qylmys qoǵamda úlken rezonans týǵyzdy. Qyrǵyzstannyń Ulttyq qaýipsizdik memlekettik komiteti iske aralasqannan keiin eki politsiia qyzmetkeri ustaldy.
Tergeý nusqasy boiynsha, Sverdlov aýdandyq ishki ister basqarmasynyń ýchaskelik inspektory aiyptalýshynyń turǵylyqty mekenjaiy boiynsha tekserý júrgizilgeni týraly qujattardy keiingi kúnmen jalǵan rásimdegen.
Al Bishkek qalalyq ishki ister bas basqarmasy arnaiy bóliminiń aǵa inspektory oǵan travmatikalyq tapanshany saqtaý jáne alyp júrý ruqsatyn zańsyz berip, birneshe ret uzartyp otyrǵan.
