Qyrǵyzstannyń syrtqy ister ministrligi eldegi jekelegen bilim mekemelerine qatysty Túrkiia syrtqy ister ministri Mevlet Chavýshoǵlýdyń málimdemesine jaýap jazdy. Qyrǵyzstan SIM málimdemesinde qyrǵyzdar Túrkiiany aǵaiyndy el dep esepteitini, eki halyqtyń túpki tarihy bir ekeni jazylǵan.
«Biz túrik sheneýnikteriniń alańdaýshylyǵyna túsinistikpen qaraimyz. Biraq biz eń áýeli Qyrǵyzstannyń jaqsy men jamandy ózi aiyra alatyn egemendi el ekenin eske salǵymyz keledi. Qaisybir eldiń syrtqy ister ministriniń, ýltimatým jáne bopsalaý tilimen, ózge bir memleketke ne isteý kerektigin nusqaý – dórekilik», – delingen málimdemede.
Buǵan deiin Chavýshoǵlý, Alania qalasynda jasaǵan baiandamasynda, Qyrǵyzstannyń «gúlenshilerge» kózqarasy ózgermese, bul jaǵdai eki el arasyndaǵy qarym-qatynasqa áser etedi dep eskertken. Túrkiia syrtqy ister ministri 25 shildede «HaberTurk» telearnasyna bergen suhbatynda osy sózderin taǵy qaitalap, Fethýllah Gúlen qozǵalysy Qyrǵyzstanda kúsheiip barady degendi qosa aitty.
«Biz birqatar elge eskertý jasadyq. Mysaly, Qyrǵyzstannyń syrtqy ister ministrine telefon soqtyq. Óitkeni olar (giýlenshiler) Qyrǵyzstandy Ortalyq Aziiadaǵy bazasyna ainaldyryp aldy. Olar bilikke kele bastady jáne Qyrǵyzstanda tóńkeris jasaýy múmkin. Túrkiiada áskeri tóńkeris jasaýǵa talpynǵan terroristik uiymnyń qyzmetine jol bermeý kerek dep esepteimin», - dep málimdegen Chavýshoǵlý.
