قىرعىزستاننىڭ سىرتقى ىستەر مينيسترلىگى ەلدەگى جەكەلەگەن ءبىلىم مەكەمەلەرىنە قاتىستى تۇركيا سىرتقى ىستەر ءمينيسترى ميەۆلەت چاۆۋشوعلۋدىڭ مالىمدەمەسىنە جاۋاپ جازدى. قىرعىزستان ءسىم مالىمدەمەسىندە قىرعىزدار تۇركيانى اعايىندى ەل دەپ ەسەپتەيتىنى، ەكى حالىقتىڭ تۇپكى تاريحى ءبىر ەكەنى جازىلعان.
«ءبىز تۇرىك شەنەۋنىكتەرىنىڭ الاڭداۋشىلىعىنا تۇسىنىستىكپەن قارايمىز. ءبىراق ءبىز ەڭ اۋەلى قىرعىزستاننىڭ جاقسى مەن جاماندى ءوزى ايىرا الاتىن ەگەمەندى ەل ەكەنىن ەسكە سالعىمىز كەلەدى. ءقايسىبىر ەلدىڭ سىرتقى ىستەر ءمينيسترىنىڭ، ۋلتيماتۋم جانە بوپسالاۋ تىلىمەن، وزگە ءبىر مەملەكەتكە نە ىستەۋ كەرەكتىگىن نۇسقاۋ – دورەكىلىك»، – دەلىنگەن مالىمدەمەدە.
بۇعان دەيىن چاۆۋشوعلۋ، الانيا قالاسىندا جاساعان بايانداماسىندا، قىرعىزستاننىڭ «گۇلەنشىلەرگە» كوزقاراسى وزگەرمەسە، بۇل جاعداي ەكى ەل اراسىنداعى قارىم-قاتىناسقا اسەر ەتەدى دەپ ەسكەرتكەن. تۇركيا سىرتقى ىستەر ءمينيسترى 25 شىلدەدە «HaberTurk» تەلەارناسىنا بەرگەن سۇحباتىندا وسى سوزدەرىن تاعى قايتالاپ، فەتحۋللاح گۇلەن قوزعالىسى قىرعىزستاندا كۇشەيىپ بارادى دەگەندى قوسا ايتتى.
«ءبىز ءبىرقاتار ەلگە ەسكەرتۋ جاسادىق. مىسالى، قىرعىزستاننىڭ سىرتقى ىستەر مينيسترىنە تەلەفون سوقتىق. ويتكەنى ولار (گيۋلەنشىلەر) قىرعىزستاندى ورتالىق ازياداعى بازاسىنا اينالدىرىپ الدى. ولار بيلىككە كەلە باستادى جانە قىرعىزستاندا توڭكەرىس جاساۋى مۇمكىن. تۇركيادا اسكەري توڭكەرىس جاساۋعا تالپىنعان تەرروريستىك ۇيىمنىڭ قىزمەتىنە جول بەرمەۋ كەرەك دەپ ەسەپتەيمىن»، - دەپ مالىمدەگەن چاۆۋشوعلۋ.
