Ol atalǵan mekemeniń jumysyna kóńili tolmaıtynyn atap ótti. Sondaı-aq, qazirgi ýaqytta ony jabý týraly usynystyń qarastyrylyp jatqanyn málimdedi.
“Qaskeleń ınfeksıalyq aýrýhanasynyń jaǵdaıy nashar. Sondyqtan da bul mekemeni jabý máselesin qarastyramyz, men buǵan qatysty tapsyrma berdim. Onyń qyzmeti Qaskeleń aýdandyq ortalyq aýrýhanasyna júkteledi. Asa aýyr dertke shaldyqqandar Qaskeleńge, Taldyqorǵanǵa nemese Almatyǵa jetkiziletin bolady”, – deıdi Birtanov.
Budan bólek, mınıstr Tamara Dúısenovanyń synyna qatysty jaýap berdi.
“Biz bir komandada jumys isteımiz, maqsatymyz bir. Bul oraıda bir-birimizge suraq qoıyp, syn aıtyp, oǵan jaýap berý – qalypty nárse dep sanaımyn”, – dep atap ótti Birtanov.
Sondaı-aq, elimizdiń bas dárigeri Qazaqstanda menıngıt epıdemıasy júrip jatqanyn joqqa shyǵardy. Mınıstrdiń aıtýynsha, jyl saıyn elimizde atalǵan derttiń beleń alatyn kezeńi bolady. Al ınfeksıany juqtyrǵandar sany osydan úsh jyl buryn, ıaǵnı 2015 jyly kóp bolypty.
“Jaýapkershilikten qashpaımyz, biz jaýapty organ bolyp tabylamyz. Biraq bul bizdiń sátsizdigimiz dep oılamaımyn. Sebebi bul dert Qazaqstanǵa tán. Iaǵnı, jyl saıyn menıngıtke shaldyqqan adamdar tirkeledi. Osydan úsh jyl buryn eń kóp adam tirkeldi. Iá, kemshilikter bar”, – deıdi Birtanov.
Birtanov menıngıtten qarapaıym gıgıena talaptaryn saqtaý ári kópshilik jınalatyn oryndarǵa barmaý arqyly saqtanýǵa bolatynyn aıtty. Mınıstr betperdiń ózin tek qajet jaǵdaıǵa kıgen durys degen pikirin bildirdi.
Derekkóz: Stan.kz
