ول اتالعان مەكەمەنىڭ جۇمىسىنا كوڭىلى تولمايتىنىن اتاپ ءوتتى. سونداي-اق، قازىرگى ۋاقىتتا ونى جابۋ تۋرالى ۇسىنىستىڭ قاراستىرىلىپ جاتقانىن مالىمدەدى.
“قاسكەلەڭ ينفەكسيالىق اۋرۋحاناسىنىڭ جاعدايى ناشار. سوندىقتان دا بۇل مەكەمەنى جابۋ ماسەلەسىن قاراستىرامىز، مەن بۇعان قاتىستى تاپسىرما بەردىم. ونىڭ قىزمەتى قاسكەلەڭ اۋداندىق ورتالىق اۋرۋحاناسىنا جۇكتەلەدى. اسا اۋىر دەرتكە شالدىققاندار قاسكەلەڭگە، تالدىقورعانعا نەمەسە الماتىعا جەتكىزىلەتىن بولادى”، – دەيدى ءبىرتانوۆ.
بۇدان بولەك، مينيستر تامارا دۇيسەنوۆانىڭ سىنىنا قاتىستى جاۋاپ بەردى.
“ءبىز ءبىر كوماندادا جۇمىس ىستەيمىز، ماقساتىمىز ءبىر. بۇل ورايدا بىر-بىرىمىزگە سۇراق قويىپ، سىن ايتىپ، وعان جاۋاپ بەرۋ – قالىپتى نارسە دەپ سانايمىن”، – دەپ اتاپ ءوتتى ءبىرتانوۆ.
سونداي-اق، ەلىمىزدىڭ باس دارىگەرى قازاقستاندا مەنينگيت ەپيدەمياسى ءجۇرىپ جاتقانىن جوققا شىعاردى. ءمينيستردىڭ ايتۋىنشا، جىل سايىن ەلىمىزدە اتالعان دەرتتىڭ بەلەڭ الاتىن كەزەڭى بولادى. ال ينفەكسيانى جۇقتىرعاندار سانى وسىدان ءۇش جىل بۇرىن، ياعني 2015 جىلى كوپ بولىپتى.
“جاۋاپكەرشىلىكتەن قاشپايمىز، ءبىز جاۋاپتى ورگان بولىپ تابىلامىز. ءبىراق بۇل ءبىزدىڭ ساتسىزدىگىمىز دەپ ويلامايمىن. سەبەبى بۇل دەرت قازاقستانعا ءتان. ياعني، جىل سايىن مەنينگيتكە شالدىققان ادامدار تىركەلەدى. وسىدان ءۇش جىل بۇرىن ەڭ كوپ ادام تىركەلدى. ءيا، كەمشىلىكتەر بار”، – دەيدى ءبىرتانوۆ.
ءبىرتانوۆ مەنينگيتتەن قاراپايىم گيگيەنا تالاپتارىن ساقتاۋ ءارى كوپشىلىك جينالاتىن ورىندارعا بارماۋ ارقىلى ساقتانۋعا بولاتىنىن ايتتى. مينيستر بەتپەردىڭ ءوزىن تەك قاجەت جاعدايعا كيگەن دۇرىس دەگەن پىكىرىن ءبىلدىردى.
دەرەككوز: Stan.kz
