"Qulager" hokkei klýbynyń basshysy Sergei Fil Qaraǵandy qalasynda qolǵa tústi. Ol buǵan deiin birneshe adamdy aldap, alaiaqtyq jasady degen kúdikpen izdeýde bolǵan, dep habarlaidy Dalanews.kz.
Soltústik Qazaqstan oblysynyń politsiia departamenti taratqan málimetke sáikes, 45 jastaǵy Astana turǵyny eki jáne odan da kóp azamatqa qatysty qarjylyq alaiaqtyq áreketter jasaǵan degen kúdikke ilingen.
"Qazirgi tańda kúdikti ýaqytsha ustaý izoliatoryna qamaldy. Atalǵan fakti boiynsha sotqa deiingi tergeý amaldary júrgizilip jatyr", — dep málimdedi vedomstvo ókilderi.
Tergeý Qazaqstan Respýblikasynyń Qylmystyq-protsestik kodeksiniń 201-babyna sáikes jalǵasyp jatyr. Sondyqtan ózge derek ázirge jariia etilmeidi.
Eske sala ketsek, buǵan deiin "Qulager" klýbynyń jetekshisi 24 qyrkúiekten bastap habar-osharsyz ketkeni týraly habarlanǵan edi. Keiin birneshe hokkeishi politsiiaǵa aryz túsirip, Sergei Fildiń alaiaqtyq is-áreketterine qatysty shaǵymdanǵan.
