Zaman ushynyp, jan-jaǵymyzda daýyl turyp jatqan shaqta halyqtyń erteńge degen senimin kúsheitý qajet. Al bul kúrespen keletin dúnie.
"Qazirgi qiyn-qystaý zamanda bizge keregi birlik. Geosaiasi jaǵdai asqynyp turǵanda, shańyraǵymyzdy shaiqap almaýdy birinshi kezekte oilaýymyz qajet.
Birlik qai zamanda da, qai qoǵamda da kerek. Bul turǵyda Qańtar oqiǵasy Qazaqstannyń táýelsizdik tarihynda bolyp kórmegen aýyr synaq boldy. Táýelsizdiktiń taǵdyry qyl ústinde turǵany ras, el irgesi sógilýge shaq qaldy. Biz bul synaqtan halyqtyń birligi men prezidenttiń erligi arqasynda shyqtyq», – dedi Dalanews-ke pikir bildirgen Májilis depýtaty.
Onyń aitýynsha birlikti saqtaý prezident Toqaevtyń saiasi strategiiasynyń basty baǵyty. El ishinde dúrbeleń boldyrmaý úshin Jańa Qazaqstan biligi qajetti sharalardy qolǵa alýda.
"Bul turǵyda halyq Assambleiadan belsendilik kútedi. Parlament qabyrǵasynda Assambleia atynan sailanǵan depýtattar bolsyn, Assambleia qataryndaǵy qoǵam belsendileri bolsyn Jańa Qazaqstannyń qabyrǵasyn qalasýǵa atsalysýy qajet. Elimizde turatyn kóptegen etnos ókilderiniń sanasynda ózgeris bolmaiynsha, birlik te bekem bolmaidy.
Assambleiaǵa Jańa Qazaqstannyń baǵytymen júrýi qajet. «Otanymyz bir, taǵdyrymyz bir» degen jalpylama urandardan arylatyn ýaqyt jetti. Assambleia músheleri Qazaqstannyń saiasi reformalaryna ún qosýyn kútip otyrmyz», – dedi halyq qalaýlysy.
Saýytbek myrzanyń atap ótkenindei syrttaǵy kikiljińder Qazaqstanǵa áset etpeitin immýnitet qalyptastyrǵanymyz jón. Bul úshin otanshyldyq atty túsinikti jańa qyrynan tanýǵa tiispiz.
Depýtattyń pikirinshe osy uǵymdy áli kúnge jete túsinbeitinder barshylyq. Otanshyldyqtyń taǵy bir maǵynasy eliń, otanyń úshin maqtaný.
«Alaida bul úshin maqtanýǵa turarlyq nárse bolýy qajet. Jasyryp jabary joq, san túrli sebepterge bailanysty sońǵy jyldary aýyz toltyryp aitarlyq jetistikterimiz azaiyp qaldy. Iá, ótken otyz jylda júrip ótken jolymyzdy joqqa shyǵarýǵa bolmaidy. Dese de, osy kúnge deiin maldanyp kelgen nárselerimiz maqtanýǵa turmaityn nárseler ekendigi belgili boldy. «Men elimmen maqtanamyn» degen jalpylama sóz, jalań urań. Nesimen maqtanamyz? Osyǵan oilandyq pa? Shyny kerek, sondaida aitatyn sóz tappai qysylasyń. Budan bylai maqtanatyn nársemiz kóp bolýy qajet.
Dál qazir halyq Jańa Qazaqstannan áleýmettik-ekonomikalyq reformalardy jedeldetip júrgizýdi kútedi. Qazaqstan qazirgi potentsialymen búgingiden bai, dáýletti myqty memleket bola alady», – deidi depýtat.
Májilismenniń pikirinshe búginderi «ártúrli kózqaras, biraq birtutas ult» degen Prezident Toqaevtyń kontseptsiiasy óte ózekti. Qazir bir ultqa ainalý, bir ultqa uiysý, sol ulttyń uiytqysy qazaq halqynyń tóńiregine toptasý mindeti mańyzdy.
«Eldegi túbirli ózgerister úshin eń aldymen memleket quraýshy ult jaýapty bolýy kerek. Álemdik ahýal aýyrlap barady. Sanktsiialar soǵysy Qazaqstanǵa tikelei áser etpeidi dep aita almaimyz. Qymbatshylyq kelip jatyr. Osyndai jaǵdaida halyqtyń júikesi burynǵydan da juqara túsedi. El ártúrli sózge ergish bola túsedi. Osyndai kezde Assambleia erekshe jaýaptylyq tanytý qajet. Eldegi ahýaldy ózgertýge úkimettiń áleýeti jeterine jurttyń kózin jetkizip, kóńilin sendirý mańyzdy», – deidi Saýytbek Ábdirahmanov.
