Birikken iste bereke bar
Osydan úsh jyl buryn Jambyl oblysynda ornalasqan Shý aýdanynda «Berekeli - 2016» kooperativi quryldy. Kooperativti uiymdastyrǵan – buǵan deiin egin egip, mal ósirý arqyly jeke sharýa qojaǵylyǵyn dóńgeletip otyrǵan isker azamat Dinmuhammed Álimqojaev bolatyn. Kooperativtiń negizgi maqsaty – mal bordaqylaýmen ainalysyp, jalpy et óndirisin jolǵa qoiý. Qai isti bolmasyn úiirip áketetin isker azamat Dinmuhammed shaǵyn sharýa qojalyǵyn keńeitýdi birazdan beri oilap júrgen edi. Alǵashynda ózine tiesili egistigine egin egip, qoldaǵy bar malyn baqqannan birqalypty tirshiligi dúrildep ketpesin túsingen bolýy kerek. Memleket tarapynan kooperativ qurýǵa, aýylsharýashylyǵyna, onyń ishinde otandyq et óndirisin damytýǵa airyqsha kóńil bólinip otyrǵany ony aýyl turǵyndarymen birlese jumys atqarýǵa itermelegen. Qazirgi tańda kooperativ músheliginde jiyrmanyń tóńireginde jeke qosalqy sharýashylyq bar. Olardyń árqaisysy Aýylsharýashylyǵyn qoldaý qory arqyly 6 paiyzben 4 million teńge kóleminde nesie alǵan. Jalpy sany 20 adam 63 mln 900 myń teńge nesie alyp, osy sharýashylyqtarda 300-den asa iri qara mal bordaqylanǵan. Ázirge ishki naryq kóleminde jumys jasaýda. Dúnmuhamed Ádilhanhojaulynyń aitýynsha, bir-eki jyldyń shamasynda mal basyn eki esege kóbeitip, et óndiretin iri fabrikalarmen birlese jumys jasamaqshy.
Odan bólek, iri qarany etke ótkizý úshin «Berekeli-2016» kooperativi aýdandaǵy bazarlarmen de kelisimshart jasasqan. Memleket berip otyrǵan múmkindikti tiimdi paidalanyp otyrǵan shýlyq sharýalar qazirdiń ózinde qora jailaryn keńeitip, mal basyn da arttyra bastaǵan.
Birlese otyryp jumys isteý kólemdi, ári tiimdi. Memleket arqylyqarjylandyrý ońtaily jáne júieli bolý úshin birigý - búgingi tańdaǵy úlken qajettiliktiń biri. Úlken sharýashylyq kólemdi jumys tyndyratynyn da esten shyǵarmaǵan abzal. Kooperativke birikken tusta sharýa qojalyqtarynyń derbestigi ózinde qalady, malyna, jerine, esep shotyna, úiine, qorasyna eshkim soqtyqpaidy. Búginde sharýalardyń basty qaýpi osy ǵana. Biriger aldyndaǵy basqosýlarda basyn ashyp alatyn nárse de osy. Kooperativter agrarlyq nesielerdi, mal sharýashylyǵy ónimderine, mal azyǵyn daiyndaýǵa beriletin sýbsidiialardy ońai alady. Mine, osynyń barlyǵyn eskerip, alaqandai aýyldaǵy isker azamattardyń basyn qosý arqyly kooperativ qurǵan Dúnmuhammed Álimqojaev óziniń ǵana emes, birneshe sharýa qojalyqtyń sharýasyn shalqytyp otyr.
