Búginde aýa tamshylary arqyly taralatyn aýrýlardyń, sonyń ishinde eń bastysy- koronavirýstyń aldyn-alý úshin maska taǵý - eń negizi qural bolyp turǵanyn esterińizge sala ketkimiz keledi.
Abzal Malbasqanov suhbat barysynda maskany tek deni saý ne aýyryp júrgen adamdar ǵana emes, sondai- aq, koronavirýspen aýyryp bolǵan adamdar da taǵýǵa mindetti ekendigin atap ótti.
"Bul pandemiia kezindegi áleýmettik jaýapkershiliktiń eń ótkir máselesi. Sebebi, adamdar koronavirýspen aýyrdym jáne maǵan endi juqpaidy dep oilaidy. Alaida olardyń basqalarǵa juqtyrý qaýipi árqashan bar", - dedi Abzal Malbasqanov.
Bir ret aýyrǵan adamdardyń qaitadan aýyrý qaýipi bar ekendigin aityp ótti. Esterińizge sala keteiik, COVID-19-dy qaita juqtyrý qaýpi joq ekendigi týraly ǵylymi dálel joq.
Sondai-aq, ol maska taǵý - qaýiptiligi jaǵynan táýekel tobyna enetin týǵan-týystaryn qorǵaýǵa múmkindik beretinin aitty. Jastarda bul aýrýdyń simptomy bilinbei ótýi múmkin. Alaida olar egde jastaǵy adamdarǵa infektsiia taratýshy bolýlary ábden yqtimal. Al egde adamdar bul aýrýmen aýyr nemese óte aýyr formada aýyrady.
"Keibir adamdar ózderiniń koronavirýspen aýyryp júrgendigin bilmeidi. Óitkeni, olarda simptomy baiqalmai ótedi. Bul adamdar basqalarǵa, ásirese ata-anasyna juqtyrady. Olar ózderi aýyrmaidy, biraq baiqamai jaqyndaryna juqtyrady", - dep tolyqtyrdy Abzal Malbasqanov.
Sondai-aq, ftiziatr dáriger maskalardy qoldaný jáne joiý erejelerine toqtaldy.
"Bir maskany birneshe kún boiy jáne eki saǵattan artyq taǵýǵa bolmaidy. Matadan jasalǵan maskalar bar. Olardy uzaq qoldanýǵa, qaitadan jýyp, dezinfektsiia jasap qaitadan taǵa berýge bolady", - dep túiindedi sózin A.Malbaskanov.
Respiratorlyq klapany bar maskadan góri, tolyq jabylyp turatyn túri áldeqaida tiimdi ekendigin aitty. Eger adam aýyryp tursa nemese virýs tasymaldaýshy bolsa, onda ol shyǵaratyn aýa atmosferaǵa túsip, kelesi adamdy juqtyrýy múmkin.
