Jańa Konstitýtsiiaǵa sáikes Qazaqstan eki palataly Parlamentten bir palataly Quryltaiǵa kóshti. Bul sheshim zań shyǵarý protsesiniń tiimdiligin arttyrýǵa baǵyttalǵan. Bul týraly Dalanews.kz tilshisine Konstitýtsiialyq Sot janyndaǵy Ǵylymi-konsýltativtik keńestiń múshesi Miras Dáýlenov aitty, dep habarlaidy dalanews.kz.
Sarapshynyń aitýynsha, zań jobalary boiynsha negizgi talqylaýlar buryn da Májiliste ótken.
«Bir palataly Parlamentke kóshý týraly sheshim, eń aldymen, zań shyǵarý protsesiniń tiimdiligin arttyrý qajettiliginen týyndady. Sebebi vitse-ministr retinde jumys istegen tájiribeme súiene otyryp aitar bolsam, zań jobalary boiynsha negizgi pikirtalastar Parlamenttiń tómengi palatasynda ótetin. Al joǵarǵy palata zań jobasyn keri qaitarýǵa nemese óz túzetýlerin engizýge quqyly bolǵanymen, bul túzetýler kóp jaǵdaida zań jobasynyń tujyrymdamalyq mazmunyn túbegeili ózgertpeitin. Senat bilik tarmaqtary arasyndaǵy tejemelik ári tepe-teńdik júiesinde mańyzdy ról atqarǵanymen, bir palataly Parlament qabyldanatyn zańdar úshin tolyq jaýapkershilikti óz moinyna alady dep esepteimin. Buǵan deiin bul jaýapkershilik Senatpen birge bólinetin», – dedi Miras Dáýlenov.
Onyń pikirinshe, jańa model zań shyǵarý jaýapkershiligin bir organǵa shoǵyrlandyrady jáne zań qabyldaý protsesin júieleidi.
«Sonymen qatar Senattyń zań jobalaryn jan-jaqty talqylaýyna ýaqyt jaǵynan belgili bir shekteýler boldy. Al Májilis bul turǵyda keńirek múmkindikterge ie edi. Máselen, Májilis Tóraǵasynyń Parlament palatalarynyń birlesken otyrysyn shaqyrý quqyǵy boldy. Sondyqtan Májilis zań shyǵarý qyzmetiniń negizgi alańy ári basty súzgisi qyzmetin atqardy. Jańa Konstitýtsiiada osynyń bárin eskere otyryp, zańdardy qabyldaý máselesin tolyqtai bir palataly Parlament – Quryltai júzege asyrady jáne qabyldanǵan zańdar úshin tolyq jaýapkershilikti ózi kóteredi degen sheshim qabyldandy», – dedi sarapshy.
Onyń aitýynsha, Quryltaidyń qurylýy zań shyǵarý sapasyn arttyrýmen qatar, qabyldanǵan sheshimder úshin saiasi ári quqyqtyq jaýapkershilikti de kúsheitedi.
