Májilis depýtaty Rinat Zaiytov "uly jetistikterge bara jatqanymyz anyq, bul – tikelei Toqaevtyń seniminiń arqasy" dep baǵalady, - dep habarlaidy Dalanews.kz.
"Qazaqta «balpań-balpań kim baspas, basýǵa baltyr shydasa», – degen jaqsy sóz bar. Osy sózdiń maǵynasyn men shynymen Májiliske kelgende ǵana túsingendeimin. Meniń kúndelikti jumysqa keletin saparymdaǵy ár qadamym aiaǵymdy eriksiz dirildetedi. Óitkeni kúndelikti Májiliske jumysqa kele jatqan ár depýtattyń ár qadamynda halyqtyń úmiti, halyqtyń amanaty jáne halyqtyń taǵdyry bar", - dedi ol.
Depýtat qoǵamnan syn jii keletinin de jasyrmady.
"Keide tipti kótergen suraǵyńa orynsyz syn taǵyp, «Osy másele sender qozǵaityn taqyryp pa? Nege joǵarydaǵylar usaq-túiek máseleler qozǵaidy» dep jatady. Óz basym bul synmen kelispeimin. Sebebi biz – bir memleketpiz! Sondyqtan usaq, iri demei, ár máselege birdei jumylýymyz kerek. Shalǵaida jatqan bir aýylda kishkentai balanyń tisi aýyrsa, oǵan Astanadaǵy ministrdiń júregi aýyrý kerek. Jumyla kótersek, júgimiz jeńildeidi", - dep úndeý jasady Zaiytov.
Onyń sózinshe, maqtanatyn da, aqtalatyn da, alda atqaratyn da jumys kóp.
"Qudaiǵa shúkir, Májiliske kelgen ýaqyttan beri qadamymyz nyqtalyp, boiymyz shynyǵyp kele jatyr. Sebebi Májilistiń búgingi quramy qazaqtyń erteńine jaraityn, keiingi býyn uqsata bilse, odan da arǵy urpaq ta qyzyǵyn kóretin zańdar shyǵaryp jatyr dep aita alamyn. Degenmen betalysymyz jaman emes. Búginde memlekette bolyp jatqan ózgeristerdi «kórmes» qana baiqamaidy.
Bul rette Parlamenttiń yqpaly aitarlyqtai artyp, halyq depýtattardyń kim ekenin, olardyń ne isteitinin tereńirek túsindi. Májiliste apta saiyn saýal joldap, úkimet múshelerin suraqtyń astyna alyp jatqan depýttarǵa qarap halyqtyń oiyndaǵy óshken úmit qaita tirildi.
Buryn el arasynda, kóshede ǵana aitylyp, uzasa birer ereýilmenen amalsyz basylyp qalatyn halyqtyń úni búginde tórge jetti. Eldiń kókeiinde júrgen túitkildiń bárin osynda qoǵam belsendilerimen, sarapshylarmen birge búkpesiz talqylaimyz", - dep sendirdi ol.
Zaiytovtyń sózinshe, Parlament halyqqa ashyq jumys istep jatyr.
"Kóterilmei qalǵan másele, aitylmai qalǵan oi joq. Osylaisha, qoǵamdy tolǵandyratyn kóptegen másele sheshimin taýyp, eldiń irgesi beki tústi. Árbir igi is júzege asqan saiyn halyqtyń bilikke degen senimi artyp keledi", - dedi ol.
Depýtat alda kóterý kerek másele de kóp ekenin aitty.
"Ókinishke qarai, qazirgi qazaq qoǵamy óte úlken jyldamdyqpen rýhani daǵdarysqa ushyrap barady. Kún saiyn elimizdiń ár túpkirinde bir otbasy buzylyp, bir oqýshy zábir kórip, bir adam kisi qolynan qaza taýyp, bireý para alyp, bireý ózine qol jumsap, bireý alaiaqqa jem bolyp jatady. Mundai mysaldar taýsylmaidy. Búgingi qazaq qoǵamy týǵanǵa tasbaýyr, jaqynǵa jaý, dosyna dushpan bolyp ketti.
Qoǵamnyń qatygez bola bastaýyna ne sebep boldy deseńizder, birden jaýap berý qiyn. Óitkeni onyń sebebi bireý emes. Turmystaǵy tarshylyq, tárbieniń joqtyǵy, jetkinshekterge úlgi bolatyn tulǵalardyń qubyjyqqa ainalýy, materialdy bailyqtyń birinshi orynǵa shyǵýy, áleýmettik jelidegi belgili tulǵalardan bastap ártúrli din men ult ókilderiniń ózara ashyq soǵysy, t.s.s. osynyń bári adamnyń rýhani tozyp, qatygez bolýyna ákelip soǵyp jatyr.
Ózimshildik pen menmendik qoǵamnyń basty indeti bolyp tur. Búgin oilanbasaq, erteń kesh bolmaq. Sondyqtan keshiktirmei ideologiialyq tárbie jumysyn kúsheitýdi bastaý kerek", - dep eskertti ol.
