ءماجىلىس دەپۋتاتى رينات زايىتوۆ "ۇلى جەتىستىكتەرگە بارا جاتقانىمىز انىق، بۇل – تىكەلەي توقايەۆتىڭ سەنىمىنىڭ ارقاسى" دەپ باعالادى، - دەپ حابارلايدى Dalanews.kz.
"قازاقتا «بالپاڭ-بالپاڭ كىم باسپاس، باسۋعا بالتىر شىداسا»، – دەگەن جاقسى ءسوز بار. وسى ءسوزدىڭ ماعىناسىن مەن شىنىمەن ماجىلىسكە كەلگەندە عانا تۇسىنگەندەيمىن. مەنىڭ كۇندەلىكتى جۇمىسقا كەلەتىن ساپارىمداعى ءار قادامىم اياعىمدى ەرىكسىز دىرىلدەتەدى. ويتكەنى كۇندەلىكتى ماجىلىسكە جۇمىسقا كەلە جاتقان ءار دەپۋتاتتىڭ ءار قادامىندا حالىقتىڭ ءۇمىتى، حالىقتىڭ اماناتى جانە حالىقتىڭ تاعدىرى بار"، - دەدى ول.
دەپۋتات قوعامنان سىن ءجيى كەلەتىنىن دە جاسىرمادى.
"كەيدە ءتىپتى كوتەرگەن سۇراعىڭا ورىنسىز سىن تاعىپ، «وسى ماسەلە سەندەر قوزعايتىن تاقىرىپ پا؟ نەگە جوعارىداعىلار ۇساق-تۇيەك ماسەلەلەر قوزعايدى» دەپ جاتادى. ءوز باسىم بۇل سىنمەن كەلىسپەيمىن. سەبەبى ءبىز – ءبىر مەملەكەتپىز! سوندىقتان ۇساق، ءىرى دەمەي، ءار ماسەلەگە بىردەي جۇمىلۋىمىز كەرەك. شالعايدا جاتقان ءبىر اۋىلدا كىشكەنتاي بالانىڭ ءتىسى اۋىرسا، وعان استاناداعى ءمينيستردىڭ جۇرەگى اۋىرۋ كەرەك. جۇمىلا كوتەرسەك، جۇگىمىز جەڭىلدەيدى"، - دەپ ۇندەۋ جاسادى زايىتوۆ.
ونىڭ سوزىنشە، ماقتاناتىن دا، اقتالاتىن دا، الدا اتقاراتىن دا جۇمىس كوپ.
"قۇدايعا شۇكىر، ماجىلىسكە كەلگەن ۋاقىتتان بەرى قادامىمىز نىقتالىپ، بويىمىز شىنىعىپ كەلە جاتىر. سەبەبى ءماجىلىستىڭ بۇگىنگى قۇرامى قازاقتىڭ ەرتەڭىنە جارايتىن، كەيىنگى بۋىن ۇقساتا بىلسە، ودان دا ارعى ۇرپاق تا قىزىعىن كورەتىن زاڭدار شىعارىپ جاتىر دەپ ايتا الامىن. دەگەنمەن بەتالىسىمىز جامان ەمەس. بۇگىندە مەملەكەتتە بولىپ جاتقان وزگەرىستەردى «كورمەس» قانا بايقامايدى.
بۇل رەتتە پارلامەنتتىڭ ىقپالى ايتارلىقتاي ارتىپ، حالىق دەپۋتاتتاردىڭ كىم ەكەنىن، ولاردىڭ نە ىستەيتىنىن تەرەڭىرەك ءتۇسىندى. ماجىلىستە اپتا سايىن ساۋال جولداپ، ۇكىمەت مۇشەلەرىن سۇراقتىڭ استىنا الىپ جاتقان دەپۋتتارعا قاراپ حالىقتىڭ ويىنداعى وشكەن ءۇمىت قايتا ءتىرىلدى.
بۇرىن ەل اراسىندا، كوشەدە عانا ايتىلىپ، ۇزاسا بىرەر ەرەۋىلمەنەن امالسىز باسىلىپ قالاتىن حالىقتىڭ ءۇنى بۇگىندە تورگە جەتتى. ەلدىڭ كوكەيىندە جۇرگەن تۇيتكىلدىڭ ءبارىن وسىندا قوعام بەلسەندىلەرىمەن، ساراپشىلارمەن بىرگە بۇكپەسىز تالقىلايمىز"، - دەپ سەندىردى ول.
زايىتوۆتىڭ سوزىنشە، پارلامەنت حالىققا اشىق جۇمىس ىستەپ جاتىر.
"كوتەرىلمەي قالعان ماسەلە، ايتىلماي قالعان وي جوق. وسىلايشا، قوعامدى تولعاندىراتىن كوپتەگەن ماسەلە شەشىمىن تاۋىپ، ەلدىڭ ىرگەسى بەكي ءتۇستى. ءاربىر يگى ءىس جۇزەگە اسقان سايىن حالىقتىڭ بيلىككە دەگەن سەنىمى ارتىپ كەلەدى"، - دەدى ول.
دەپۋتات الدا كوتەرۋ كەرەك ماسەلە دە كوپ ەكەنىن ايتتى.
"وكىنىشكە قاراي، قازىرگى قازاق قوعامى وتە ۇلكەن جىلدامدىقپەن رۋحاني داعدارىسقا ۇشىراپ بارادى. كۇن سايىن ەلىمىزدىڭ ءار تۇپكىرىندە ءبىر وتباسى بۇزىلىپ، ءبىر وقۋشى ءزابىر كورىپ، ءبىر ادام كىسى قولىنان قازا تاۋىپ، بىرەۋ پارا الىپ، بىرەۋ وزىنە قول جۇمساپ، بىرەۋ الاياققا جەم بولىپ جاتادى. مۇنداي مىسالدار تاۋسىلمايدى. بۇگىنگى قازاق قوعامى تۋعانعا تاسباۋىر، جاقىنعا جاۋ، دوسىنا دۇشپان بولىپ كەتتى.
قوعامنىڭ قاتىگەز بولا باستاۋىنا نە سەبەپ بولدى دەسەڭىزدەر، بىردەن جاۋاپ بەرۋ قيىن. ويتكەنى ونىڭ سەبەبى بىرەۋ ەمەس. تۇرمىستاعى تارشىلىق، تاربيەنىڭ جوقتىعى، جەتكىنشەكتەرگە ۇلگى بولاتىن تۇلعالاردىڭ قۇبىجىققا اينالۋى، ماتەريالدى بايلىقتىڭ ءبىرىنشى ورىنعا شىعۋى، الەۋمەتتىك جەلىدەگى بەلگىلى تۇلعالاردان باستاپ ءارتۇرلى ءدىن مەن ۇلت وكىلدەرىنىڭ ءوزارا اشىق سوعىسى، ت.س.س. وسىنىڭ ءبارى ادامنىڭ رۋحاني توزىپ، قاتىگەز بولۋىنا اكەلىپ سوعىپ جاتىر.
وزىمشىلدىك پەن مەنمەندىك قوعامنىڭ باستى ىندەتى بولىپ تۇر. بۇگىن ويلانباساق، ەرتەڭ كەش بولماق. سوندىقتان كەشىكتىرمەي يدەولوگيالىق تاربيە جۇمىسىن كۇشەيتۋدى باستاۋ كەرەك"، - دەپ ەسكەرتتى ول.
