Bir aptaǵa - 60 mln teńge: Túrkistanda oqý saparyna qatysty daý shyqty

Bir aptaǵa - 60 mln teńge: Túrkistanda oqý saparyna qatysty daý shyqty
Foto: JI

Túrkistan oblysyndaǵy birqatar memlekettik meditsina uiymy qyzmetkerleriniń Londondaǵy bir aptalyq oqýyna shamamen 60 mln teńge jumsaǵan. Áleýmettik jelide jariialanǵan málimetke súiensek, kelisimder konkýrs ótkizilmei, bir kózden satyp alý tásilimen jasalǵan, dep habarlaidy dalanews.kz. 

Facebook qoldanýshysy Jaqyp Shámshievtiń jazýynsha, 2026 jylǵy 5-12 qyrkúiek aralyǵynda ótken oqý saparyn uiymdastyrýǵa Túrkistan oblysynyń birneshe meditsinalyq mekemesi qatysqan. Kelisimder "AlmaEco" JShS-men jasalǵany kórsetilgen.

Jariialanym avtory bir mekeme boiynsha kelisim quny 5 mln 837 myń teńgeni quraǵanyn, al jalpy somasy 60 mln teńgege jýyqtaǵanyn alǵa tartady. Onyń esebinshe, bir qatysýshynyń Londondaǵy bir aptalyq saparyna shamamen 6,9 mln teńge, iaǵni 15,5 myń dollar jumsalǵan.

Qandai meditsinalyq uiymdar ataldy?

Jariialanǵan málimetke sáikes, bir kózden satyp alý tásilimen kelisim jasaǵan mekemeler qatarynda Maqtaaral aýdandyq «Atakent» aýrýhanasy, Báidibek aýdandyq ortalyq aýrýhanasy, Túrkistan oblystyq balalar aýrýhanasy, №3 oblystyq perinataldyq ortalyq, oblystyq oftalmologiialyq aýrýhana, Túrkistan qalalyq balalar aýrýhanasy, Kentaý qalalyq emhanasy, Otyrar aýdandyq ortalyq aýrýhanasy, №1 oblystyq perinataldyq ortalyq jáne Túrkistan qalalyq emhanasy atalǵan.

Avtordyń aitýynsha, osy meditsinalyq uiymdardyń basshylary Londonǵa baryp, meditsinalyq mekemelerdi basqarý, sondai-aq ana men bala densaýlyǵyn qorǵaý baǵyttarynda bilim alǵan.

"Saparǵa Túrkistan oblysyndaǵy on meditsinalyq uiymnyń basshysy qatysqan. Olardyń árqaisysynyń Londondaǵy bir aptalyq oqýyna memlekettik biýdjetten qomaqty qarajat jumsaldy", – dep jazdy Jaqyp Shámshiev.

Budan áldeqaida arzan usynys bolǵan

Jaqyp Shámshiev ózi ókildik etetin uiymnyń Londonda 2006 jyldan beri meditsinalyq mamandardyń biliktiligin arttyrý baǵdarlamalaryn uiymdastyryp kele jatqanyn jazǵan.

Ol buǵan deiin Túrkistan oblysynyń densaýlyq saqtaý basqarmasyna dárigerler men medbikelerdi oqytý jóninde birneshe kommertsiialyq usynys jiberilgenin málimdedi. Solardyń birinde Londondaǵy bir aptalyq kýrs barlyq shyǵyndy qosa eseptegende bir adamǵa 4 450 fýnt sterlingke usynylǵan.

Avtor qazirgi kelisimderdegi shyǵyn budan edáýir joǵary ekenin aityp, qarajattyń tiimdi jumsalýyna kúmán keltiredi.

"Bizdiń usynysymyz boiynsha on adamnyń Londondaǵy oqýyna 44 500 fýnt qajet edi. Al memlekettik uiymdar dál osyndai saparǵa 100 942 fýnt jumsaǵan. Aiyrmasy – 56 442 fýnt", – dep jazdy ol.

Onyń esebinshe, bul aiyrma teńgege shaqqanda ondaǵan millionǵa jetedi.

Burynǵy sapardy mysalǵa keltirdi

Jariialanym avtory Túrkistan oblysy densaýlyq saqtaý basqarmasynyń qazirgi basshysy Ashan Baidýálievtiń 2013 jyly Ulybritaniiada eki aptalyq "Densaýlyq saqtaý menedjmenti" kýrsyna qatysqanyn da eske saldy. Ol kezde Baidýáliev Almaty oblysyndaǵy Qarasai aýdandyq ortalyq aýrýhanasyn basqarǵan.

Jaqyp Shámshievtiń aitýynsha, atalǵan eki aptalyq baǵdarlama quny qazirgi bir aptalyq sapardan shamamen úsh ese arzan bolǵan.

"2013 jyly Ashan Baidýáliev Londonda eki apta oqydy. Sol kezdegi shyǵyn qazir ár qatysýshynyń bir aptasyna tólengen somadan áldeqaida az edi. Bir aptalyq sapar 7 mln teńgege jýyq turmaýǵa tiis", – deidi jazba avtory.

Satyp alý tásiline qatysty saýal týyndady

Jariialanymda meditsinalyq uiymdardyń sharttardy ashyq konkýrssyz, bir kózden satyp alý tásilimen rásimdegeni aitylǵan. Avtor qyzmet kórsetýshi kompaniianyń buǵan deiin Ulybritaniiada meditsina qyzmetkerleriniń biliktiligin arttyrý baǵdarlamalaryn uiymdastyrǵan tájiribesine de kúmán keltiredi.

Sonymen qatar memlekettik satyp alý portalynda qyzmettiń oryndalǵany kórsetilgenimen, sapardan túsirilgen foto nemese oqý baǵdarlamasynyń nátijeleri ashyq jariialanbaǵanyn alǵa tartady.

"Eger qyzmet rasymen kórsetilse, onyń baǵdarlamasy, qatysýshylar tizimi men qorytyndysy nege ashyq jariialanbaǵan? Al sapar bolmaǵan jaǵdaida, 60 mln teńgelik sharttardyń taǵdyry ne boldy?" – dep saýal tastady Jaqyp Shámshiev.