Qazaqstandyq júrgizýshiler mindetti avtosaqtandyrýdy rásimdeý kezinde qiyndyqqa tap bolǵanyn aityp shaǵymdandy. Olardyń sózinshe, saqtandyrý kompaniialarynyń saittary men qosymshalary istemeidi, al keńsege barýdyń paidasy joq. Keibiri birneshe kúnnen beri polis ala almai júr, dep habarlaidy dalanews.kz.
Threads jelisinde Halyk, "Eýraziia", Nomad jáne basqa saqtandyrý kompaniialarynyń servisterine qatysty shaǵymdar kóbeigen. Júrgizýshiler júie saqtandyrý qunyn esepteý nemese tólem jasaý kezinde qatyp qalatynyn aitady. Keibir klientter qoldanystaǵy polisti uzarta, ózgerte nemese buza almai júr.
Tehnikalyq aqaýlarmen qatar, júrgizýshiler saqtandyrý rásimdeý kezinde qosymsha aqy suraitynyna da shaǵymdanǵan. Máselen, keibirine brokerlik qyzmet úshin 10-20 myń teńge tóleý usynylǵan.
Buǵan deiin Qarjy naryǵyn retteý jáne damytý agenttigi mindetti saqtandyrý polisterin qymbat usynatyn zańsyz deldaldar týraly eskertken. Retteýshi mindetti saqtandyrý boiynsha deldaldyq qyzmetke tyiym salynǵanyn, polisti litsenziiasy bar saqtandyrý kompaniialary arqyly tikelei rásimdeý keregin eske saldy.
Polisti onlain rásimdeý múmkindigi táýlik boiy qamtamasyz etilýge tiis. Al internet-servis istemese, júrgizýshi kompaniia keńsesine jazbasha ótinishpen júgine alady.
Saqtandyrý rásimdelmese, júrgizýshilerge saittaǵy aqaýlardy skrinshot nemese videoǵa túsirip, kompaniiaǵa jazbasha ótinish qaldyrý usynylady. Másele sheshilmese, Qarjy naryǵyn retteý jáne damytý agenttigine eOtinish.kz arqyly shaǵymdanýǵa bolady. Keńes alý úshin 1459 nómirine habarlasýǵa múmkindik bar.
Burynǵy polistiń merzimi aiaqtalsa, jańa saqtandyrýsyz kólik júrgizýge bolmaidy. Sait istemeýi nemese shaǵym túsirý júrgizýshini mindetti saqtandyrý talabynan bosatpaidy.