Raqymshylyqqa ilikpeı qalǵan Nurlan Jolamanov túrmede otyryp áshkereleýshi materıaldaryn jarıalaǵaly jatyr. 11 jylǵa sottalǵan Shekara qyzmetiniń eks-basshysy buryn birge jumys istegen  áriptesteriniń bar bylyǵyn ashpaq. Tipti derekterin tizip Aqordaǵa joldap ta qoıypty. Bul jaıynda KTK arnasy habarlady.

Óz kezeginde Nurlan Jolamanovtyń qorǵaýshysy Mustahım Tóleev:

- Ol buryn da Prezıdent ákimshiligine hat jazǵan.  Shekara qyzmetiniń júıesinde keń etek alǵan qylmys áreketterin, memlekettiń qarjysy talan-tarajǵa salynǵanyn jazǵan. Tipti, laýazymdy adamdardyń aty-jónin kórsetken. Biraq ol jabýly qazan kúıde qaldy. Taıaýda men kezdesýge barǵanda ol: «Óz tarapynan resmı aryz ázirlep jatyrmyn. Kóp qylmystardyń betin ashamyn» degen bolatyn, - deıdi.

Jolamanovtyń ashýlanýyna sebep te joq emes. Óıtkeni, ol Táýelsizdiktiń 25 jyldyǵyna oraı jarıalanǵan raqymshylyqqa ilikpeı qalypy.

Sot zeınet jasyna jetken Shekara qyzmetiniń eks-dırektoryn amnıstıaǵa ilikkenderdiń  tizimine qospaǵan. Endi ol sottyń sheshimine qarsy qaıta shaǵymdanbaq.

Esterińizge salsaq, Jolamanov 2014-shi jyly ustalyp, byltyr 11 jylǵa sottalǵan bolatyn. Laýazymdy áskerıge para aldy, qylmystyq top qurdy degen aıyptar taǵylǵan.

Jáýdir Orazhan