Qyzylordanyń «Óner ortalyǵynda» «Jańa halyqtyq Konstitýtsiianyń normalary men qundylyqtary: Adami kapitaldy damytý – bilim berý júiesiniń strategiialyq negizi» atty oblystyq pedagogikalyq tamyz konferentsiiasy ótti, dep habarlaidy dalanews.kz.
Alqaly jiynǵa oblys ákimi Murat Ergeshbaev, Oqý-aǵartý ministrliginiń Bilim salasynda sapany qamtamasyz etý komiteti tóraǵasynyń orynbasary Jámilá Esanova, Ǵylym jáne joǵary bilim ministriniń keńesshisi Rýslan Emelbaev, oblystyq máslihat tóraǵasy Murat Tleýmbetov, ziialy qaýym ókilderi, bilim salasynyń ardagerleri men ustazdar qatysty.
Tamyz konferentsiiasynda aimaqtyń bilim berý salasyndaǵy jetistikter men mańyzdy bastamalar jan-jaqty talqylandy.
«Jańa oqý jyly qarsańynda aldaǵy damý baǵytyn belgileý óte mańyzdy. Ustazdardyń respýblikalyq tamyz konferentsiiasynda Memleket basshysy Qasym-Jomart Kemeluly: «Ádiletti, Qýatty, Qaýipsiz ári Taza Qazaqstannyń tiregi bolatyn jaýapty ári adal azamattardy tárbieleý – bárimizdiń ortaq mindetimiz» dep atap ótti.
Basymdyqtardyń qatarynda kadr tapshylyǵyn joiyp, ustazdardyń biliktiligin kóterý, aimaqtar arasyndaǵy bilim sapasyna qatysty alshaqtyqty joiý, jasandy intellektini orta bilim berý júiesine engizý, balalardy qorǵaý jáne olardyń tárbiesine mán berý sekildi negizgi bes baǵyt aiqyndaldy.
Prezidentimiz óz sózinde Qyzylorda oblysynyń mektep bitirýshileri Ulttyq biryńǵai testileýdiń qorytyndysy boiynsha joǵary kórsetkishke qol jetkizgenin erekshe atap ótti. Túlekterimiz úshinshi jyl qatarynan respýblikada birinshi orynda. Bul eń aldymen ustazdardyń tabandy eńbegi men memleket qoldaýynyń nátijesi dep bilemin.
Oblystyń 967 túlegi «Altyn belgi», 1124 túlegi «Úzdik attestat» iegeri atandy. Bilim alýshylardyń jetistikterin monitoringteý nátijesinde oqýshylarymyz 4-synyptar arasynda respýblika boiynsha úshinshi, 9-synyptar arasynda ekinshi orynǵa ie boldy.
Bul – jaqsy nátije. Biraq osy jetistiktermen shektelýge bolmaidy.
Prezidentimiz aýyl mektepterin damytý jáne bilim sapasy tómen aimaqtarǵa naqty qoldaý kórsetýdi tapsyrdy. Osy rette qala men aýyl mektepteri arasyndaǵy aiyrmashylyqty qysqartyp, árbir balanyń sapaly bilim alýyna jaǵdai jasaýymyz qajet. Sonymen birge, halyqaralyq jáne respýblikalyq olimpiadalarǵa, ǵylymi jobalar men ziiatkerlik jarystarǵa qatysatyn daryndy oqýshylardy qoldaý júiesin kúsheitýimiz kerek.
Memleket basshysy aitqandai: «Ustaz – ulttyń shamshyraǵy». Osy jaýapty jolda Sizderge zor densaýlyq, sarqylmas kúsh-qýat, shyǵarmashylyq izdenis pen kásibi tabys tileimin. Jańa oqý jyly barshańyzǵa tyń bastamalar men jarqyn jeńister ákelsin!» – dedi aimaq basshysy.
Sondai-aq, oblys ákimi jaýapty tulǵalarǵa jasandy intellektini bilim berý júiesine engizýde pedagogterdiń tsifrlyq quzyretin arttyrýdy, oqý protsesinde tiimdi ári qaýipsiz paidalanýdyń ozyq tájiribelerin engizýdi tapsyrdy.
«Adal azamat», «Zań men tártip», Konstitýtsiialyq qundylyqtar tárbie jumysynyń negizgi ózegine ainalýy kerek. Bul mindetti tek mektepke júktep qoiýǵa bolmaidy. Memleket, mektep, ata-ana jáne qoǵam birlesip jumys istegende ǵana nátije shyǵady.
Budan bólek, aimaq basshysy pedagogterdiń biliktiligin arttyrýdy, jas muǵalimderdi qoldaý jáne tálimgerlik institýtyn kúsheitýdi, balalardyń zańdy múddeleri men qaýipsizdigin qamtamasyz etýdi, áleýmettik osal toptaǵy balalarǵa kómek kórsetýdi, qosymsha bilim berý uiymdarynyń múmkindigin tiimdi paidalanyp, balalardyń bos ýaqytyn uiymdastyrýdy, sybailas jemqorlyq táýekelderiniń aldyn alýdy tapsyrdy.
Jiynda oblystyq bilim basqarmasynyń basshysy Asqarbek Esjanov, Oqý-aǵartý ministrliginiń Bilim salasynda sapany qamtamasyz etý komiteti tóraǵasynyń orynbasary Jámilá Esanova, Ǵylym jáne joǵary bilim ministriniń keńesshisi Rýslan Emelbaev, Qorqyt ata atyndaǵy Qyzylorda ýniversitetiniń basqarma tóraǵasy – rektory, oblystyq qoǵamdyq keńes tóraǵasy Naýryzbai Baiqadamov, №10 Bilim-innovatsiia litsei-internatynyń muǵalimi Naǵisha Esbosyn, Memlekettik qyzmet isteri agenttigi Qyzylorda oblysy boiynsha departamentiniń basshysy Erlegen Mendaliev baiandama jasady.
Memleket basshysy Qasym-Jomart Kemelulynyń qatysýymen Astana qalasynda ótken tamyz keńesinde Jalaǵash aýdany Ál-Farabi atyndaǵy №201 mektep-litseiiniń muǵalimi Aigúl Shildebaeva «Qazaqstannyń eńbek sińirgen ustazy» qurmetti ataǵymen marapattalǵan bolatyn.
Al «Orta bilim beretin úzdik uiym» atalymy boiynsha beriletin 34 mln teńge grantqa Jańaqorǵan aýdany boiynsha bilim bóliminiń № 286 mektep-litseii laiyq dep tanyldy. Búgingi basqosýda bilim salasynda eseli eńbek etip júrgen ustazdar «Qurmet» ordenimen, «Eren eńbegi úshin», «Shapaǵat» medaldarymen, «Qazaqstannyń eńbek sińirgen ustazy» qurmetti ataǵymen, Qyzylorda oblysynyń Qurmet gramotasymen, «Qyzylorda oblysynyń damýyna qosqan úlesi úshin» medalimen, oblys ákiminiń Alǵys hatymen, Oqý-aǵartý ministrliginiń «Eńbek ardageri», «Ybyrai Altynsarin» medaldarymen, «Bilim berý salasynyń úzdigi» tósbelgisimen, «Orta bilim berý isiniń úzdigi» qurmet diplomy, Qurmet gramotasy, ministrdiń Alǵys hatymen marapattaldy.
