Depýtat Natalia Dementeva Májilis otyrysynda qazirgi bilim berý júiesin synady, dep habarlaidy Dalanews.kz.
Onyń aitýynsha, áý basta Kundelik.kz platformasy oqýshylar men muǵalimder arasyndaǵy bailanysty jeńildetýge, bilim sapasyn arttyrýǵa baǵyttalǵan qural retinde engizilgen. Dese de, depýtattyń pikirinshe, qazir bul platforma óz missiiasynan aýytqyp, muǵalimderdiń negizgi kásibi fýnktsiiasy - sabaq berý men bala tárbiesi ekinshi orynǵa ysyrylyp, qosymsha esep pen formalizmge ainalyp ketken.
"Tsifrlyq transformatsiianyń maqsaty ýaqytty únemdeý jáne tiimdilikti arttyrý ekeni barshaǵa málim. Biraq bul turǵyda ol muǵalimder úshin qosymsha júkteme bolyp otyr. Mysaly aptasyna 25 saǵaty bar muǵalim Kundelik.kz-te kúnine 1-1,5 saǵat ýaqyt jumsaýyna týra keledi. Iaǵni kúndelikti taqyryptyq jospar jasaý, úi tapsyrmalaryn qadaǵalaý, baǵalaý jáne oqýshynyń túsingenin taldaý jumystaryn elektron kúndelikke engizý qosymsha ýaqytty talap etedi. BJB jáne TJB kezinde bul jumystyń kólemi eki ese artatyny aitpasa da túsinikti. Saldarynan muǵalimniń sabaqqa daiyndalatyn ýaqyty qysqarady", - dedi Dementeva.
Halyqaralyq uiymdardyń baǵalaýynsha, Qazaqstanda muǵalimderdiń aptalyq júktemesi orta eseppen 36 saǵat bolsa, onyń tek 23 saǵaty sabaqqa jumsalady, al qalǵan bóligi daiyndyq, tekserý, esep jáne ákimshilik jumysqa ketedi. Muǵalimderdiń shamamen 25 paiyzy artyq ákimshilik júktemeni stress kózi dep sanaidy.
"Bilim berý salasyndaǵy paradoks - qaǵazbastylyqtan arylamyz dep júrip muǵalimderdi tsifrlyq esepke bailap qoidyq. Bastapqy ideia qandai edi?! Muǵalimdi artyq esepten bosatyp, onyń ýaqytyn oqýshyǵa baǵyttaý boldy. Nátijesinde qaǵaz azaidy, biraq esep berý sany azaimady, erkindik artpady, kerisinshe baqylaý kúsheidi", - dedi ol.
Natalia Dementeva Úkimetten Kundelik.kz platformasyn qaita qaraýdy surady. Sonymen qatar, platformada oqytý protsesine qajet derekti qaldyrý mańyzdy ekenin málimdedi.
"Qazaqstandaǵy qazirgi júiede muǵalim pedagog emes, operatorǵa ainalyp, sabaq sapasy emes, jýrnal toltyrý sapasy baǵalanady", - dep túiindedi ol.
