QR BǴM málimetinshe, qujattardy qabyldaý elektrondyq formatta júzege asyrylatyn bolady.
Talapkerler men olardyń ata-analarynyń densaýlyǵyn qorǵaý maqsatynda joǵary oqý oryndarynda vırtýaldyq qabyldaý komısıalary jumys istep, talapkerlerge beıne baılanys arqyly keńes beredi. Oqýǵa túsýshiler 6 mamyr men 1 shilde aralyǵynda ótken UBT-nyń eki nátıjesiniń bireýin konkýrsqa usyna alady, dep naqtylaıdy quzyrly mınıstrlik.
Ótinish bergen kezde talapkerler atestat, atestatqa qosymshanyń elektrondyq kóshirmelerin jáne elektrondyq qujat nysanyndaǵy kólemi 3×4 sandyq fotosýretti, sondaı-aq basqa da qujattardyń kóshirmelerin qosa tapsyrýy qajet.
Eger talapker "Altyn belgi" ıegeri nemese otansúıgishtik jáne belsendi azamattyq ustanymy úshin erekshelik belgisimen marapattalǵan bolsa, onda ol basqa úmitkerlermen baldary teń bolǵan jaǵdaıda basym quqyqqa ıe bolady. Olımpıadalar men sporttyq jarystardyń jeńimpazdary úshin de osyndaı artyqshylyqtar qarastyrylǵan. Talapkerlerdiń mundaı jetistikteriniń eskerilýi úshin qujattardy tapsyrý kezinde rastaıtyn qujattardyń kóshirmelerin tirkeý qajet. Shet tilin meńgergenin rastaıtyn halyqaralyq sertıfıkat bolǵan kezde ótinish berýshi sertıfıkattyń ataýyn, balyn kórsetedi jáne elektrondyq sertıfıkatty tirkeıdi.
Sonymen qatar bıyl bilim berý granttaryn bólý kezinde QR BǴM alǵash ret halyqtyń áleýmettik osal toptaryna kvotalar bóldi. Endi kópbalaly nemese tolyq emes otbasylardan shyqqan balalar, sondaı-aq erekshe qajettilikteri bar balalardy tárbıelep otyrǵan otbasylardaǵy talapkerlerdiń grant alý múmkindikteri joǵarylaı tústi.
Kámeletke tolmaǵan tórt jáne odan kóp bala tárbıelep otyrǵan otbasylardaǵy balalar úshin granttardyń jalpy sanynyń 5%-y, keminde úsh jyl tolyq emes otbasy mártebesi bar otbasylardan shyqqan balalarǵa – 1%, İ, İİ toptaǵy múgedek balalardy tárbıelep otyrǵan otbasylardan shyqqan túlekterge bilim berý granttarynyń 1%-y kózdelgen.
UBT qorytyndysy boıynsha keminde 65 bal jınaǵan talapkerler Ulttyq joǵary oqý oryndaryna túse alady.
"Pedagogıkalyq ǵylymdar" – keminde 75 bal, "Densaýlyq saqtaý" − keminde 70 bal, "Aýyl sharýashylyǵy jáne bıoresýrstar", "Veterınarıa" – keminde 60 bal, basqa joǵary oqý oryndaryna - keminde 50 bal. Bul rette UBT-nyń árbir páni jáne (nemese) shyǵarmashylyq emtıhan boıynsha keminde 5 bal jınaý qajet.
