Qurmetti meimandar – Ibn Haldýn ýniversiteti Qamqorshylyq keńesi tóraǵasynyń orynbasary Nejmeddin Bilál Erdoǵan jáne Ibn Haldýn ýniversitetiniń rektory, professor Atilla Arkan, Qamqorshylyq keńesiniń tóraǵasy, doktor Irfan Gúndúz, Geidar Áliev atyndaǵy Eýraziialyq zertteýler ortalyǵynyń direktory, professor Iashar Sary, Ibn Haldýn ýniversitetiniń halyqaralyq bailanystar bóliminiń direktory Enes Ialman Ál-Farabi kitaphanasynda bolyp, QazUÝ qalashyǵy qurylysynyń ekinshi kezeńin iske asyrý josparymen tanysty.
Qos tarap shaǵyn quramda kezdesý ótkizip, ortaq máselelerdi talqylady. Júzdesýde Ibn Haldýn ýniversiteti Qamqorshylyq keńesi tóraǵasynyń orynbasary Nejmeddin Bilál Erdoǵan QS WUR reitinginde joǵary jetistikke jetken Ál-Farabi atyndaǵy QazUÝ ujymyn quttyqtady.
«Ál-Farabi orta ǵasyrdyń asa kórnekti oishyly retinde túrki halyqtarynyń rýhani mádenietinde airyqsha iz qaldyrdy. Osy oraida, Qazaqstannyń kóshbasshy ýniversiteti – QazUÝ-dyń ál-Farabi esimimen atalýy úlken mártebe. Qazaqstan – múmkindikter eli.
Prezident Rejep Taiyp Erdoǵanmen kezdesýde Qazaqstan Respýblikasynyń Prezidenti Qasym-Jomart Toqaev eki el arasyndaǵy seriktestik kún sanap damyp kele jatqanyn atap ótken bolatyn.
Eki el basshylarynyń resmi kezdesý nátijesinde 15 kelisimge qol qoiyldy. Sonyń ishinde bilim berý salasyna erekshe nazar aýdarylǵan edi. Biz bilim jáne ǵylym ókilderi retinde osy bastamalarǵa óz úlesimizdi qosýymyz qajet. Búgingi kezdesýden soń Ibn Haldýn men QazUÝ arasynda oqytýshylar men stýdent almasý boiynsha birqatar baǵdarlamalar iske asyrylatynyn atap ótkim keledi. Aldaǵy ýaqytta qos ýniversitet arasyndaǵy ortaq innovatsiialyq jobalar sátti júzege asady degen úmittemin», – dedi Nejmeddin Bilál Erdoǵan.
Sonymen qatar kezdesýde sóz sóilegen Ibn Haldýn ýniversiteti Qamqorshylyq keńesiniń tóraǵasy, professor, doktor Irfan Gúndúz ǵylym men bilim salasyndaǵy yntymaqtastyq boiynsha birqatar usynystaryn jetkizip, QazUÝ-men seriktestikti damytýǵa daiyn ekenin jetkizdi.
Óz kezeginde Ál-Farabi atyndaǵy Qazaq ulttyq ýniversitetiniń Basqarma Tóraǵasy – Rektory Janseiit Túimebaev bilim ordasynda atqarylǵan jumystar men aldaǵy maqsattaryna toqtaldy. Búginde bilim ordasy álemniń 500-den astam ýniversitetimen, sonyń ishinde Túrkiianyń 21 joǵary oqý ornymen tabysty yntymaqtastyq ornatqan. Qazirgi ýaqytta oqý ordasynda Túrkiia Respýblikasynan kelgen 32 stýdent bilim alýda. Ózara tájiribe almasý maqsatynda QazUÝ-da Túrkiianyń túrli ýniversitetterinen 49 professor dáris oqydy, PhD doktoranttarǵa ǵylymi jetekshilik etti.
«Aǵymdaǵy jyldyń mamyr aiynda Qazaqstan Prezidentiniń Túrkiia men Qyrǵyz Respýblikasyna memlekettik sapary aiasynda biz QazUÝ-dyń Ystambul jáne Bishkek qalalarynda filialyn ashtyq. Mundai yntymaqtastyq nátijeleri QazUÝ-dy álemdik deńgeidegi zertteý ýniversitetine ainaldyrýǵa naqty úles qosady dep oilaimyz. Aldaǵy jumystar bilim berý sapasyn túbegeili jaqsartýǵa jáne eldiń áleýmettik-ekonomikalyq damýyndaǵy ǵylym úlesin arttyrýǵa baǵyttalatyn bolady», – dedi ýniversitet basshysy.
Bul kezdesý ekijaqty qarym-qatynasty damytý aiasynda akademiialyq utqyrlyq, oqytýshylar men stýdentter almasý, birlesken ǵylymi zertteýler sheńberindegi jobalardy iske asyrýdy kózdeidi. Óz sózinde Janseiit Túimebaev jemisti yntymaqtastyq pen ózara is-qimyldy keńeitýge baǵyttalǵan bastamalardy qoldaýǵa nietti ekenin atap ótti.
Shara sońynda Ibn Haldýn ýniversiteti men Ál-Farabi atyndaǵy Qazaq ulttyq ýniversiteti akademiialyq jáne bilim berý boiynsha yntymaqtastyq týraly kelisimge qol qoidy.
Ál-Farabi atyndaǵy QazUÝ-dyń Baspasóz qyzmeti
