Prezident Toqaevpen emen-jarqyn áńgime-dúken qurǵan Si Tszinpin Qytaidyń «Qazaqstan úshin senimdi seriktes ári ainymas bos bolyp qalaryn» atap ótti.
«Halyqaralyq ahýal sońǵy kezderi myń qubylyp tur. Soǵan qaramai Qazaqstannyń táýelsizdigin, egemendigin jáne territoriialyq tutastyǵyn batyl, sheshimdi túrde qorǵaýǵa kepildik beremiz.
Sizdiń eldegi turaqtylyq men damýdy qamtamasyz etý baǵytyndaǵy saiasi reformalaryńyz cátti júzege asyp, óz nátijesin bererine kúmánimiz joq. Biz Qazaqstannyń ishki isine aralasqysy keletin úshinshi taraptardyń áreketine úzildi-kesildi qarsymyz jáne buǵan tabandy túrde tosqaýyl qoiamyz», – deidi Si myrza.
Dalanews.kz tilshisi osy oraida saiasattanýshy Daniiar Áshimbaevpen pikirlesken edi.
«Qytai Qazaqstandy Orta Aziianyń kóshbasshysy dep sanaidy. Orta Aziia elderimen áriptestik bailanysty nyǵaitýda aldymen Aqordaǵa qarailaidy. Si Tszinpin Toqaevtyń tusyndaǵy Qazaqstanmen jańa saiasi-ekonomikalyq qarym-qatynastyń negizin qalaýdy kózdep otyr.
Beijiń basshysynyń pandemiiaden bergi alǵashqy sapary Qazaqstannan bastalýy da Qytaidyń bizdiń elge kórsetken qurmeti ispettes. Eki eldiń arasyndaǵy alys-beris, barys-kelis arta tússe, budan eki tarap ta utylmaityny anyq.
Si myrza preziden Toqaevpen júzdesýinde «dostyq» jáne «áriptestik» degen sózderdi bir emes, jeti márte aitty. Bul Qazaqstan – Qytai bailanystarynyń jańa kezeńge aiaq basqanyn aiaǵaqtap otyr», – deidi Áshimbaev.
Resmi málimet boiynsha eki eldiń arasynda diplomatiialyq bailanys ornaǵaly beri Qytai Qazaqstan ekonomikasy 70 mlrd dollarǵa jýyq investitsiia quiǵan. Munyń negizgi bóligi – munai-gaz sektory, energetika, taý ken óndirisi jáne transporttyq logistikany jetildirýge baǵyttalǵan.
«Eki eldi eki birdei magistraldy munai qubyry bailanystyryp jatyr. Keńqiiaq – Qumkól jáne Atasý – Alashankoý munai qubyrlary arqyly jylyna 30 mln tonna «qara altyn» tasymaldanady.
Bertingi jyldary Qytai biliginiń muryndyq bolýymen «Batys Eýropa jáne Batys Qytai» avtokólik dálizi paidalanýǵa berildi. Azdaǵan ýaqytta Batys elderimen saýda-sattyqtyń kúretamyryna ainalǵan tas joldyń 2800 shaqyrymy Qazaqstannyń territoriiasyn basyp ótedi. Qytaidyń qoldaýmen salynǵan shoiyn joldar Aqtaý men Quryq portyna taýar jetkizýdi jeńildetti. Qazaqstan men Qytaidyń shekarasyndaǵy Qorǵas portynyń «Dostyq» beketin jańalaý, jetildirý jumystary júrgizilip jatyr. Dál osy jerde Batys elderine jetkiziletin taýarlar poiyzǵa tielip, Eýropaǵa attanady», – deidi sarapshy.
Áshimbaevtyń atap ótkenindei Qytai investitsiia bizdiń elge jańa óndiris oryndary men jumys oryndaryn qurýǵa járdemdesýde.
Smaiylov úkimeti Qytaidyń «Bir jol, bir beldeý» jobasynyń «Nurly jol» baǵdarlamasymen bailanystyryp, Qazaqstannyń logistikalyq jáne tranzittik potentsialyn arttyrýǵa kúsh salýda.
«Qytai Qazaqstannyń transporttyq jáne logistikalyq áleýetin kúsheitýge, el aýmaǵynda arnaiy ekonomikalyq aimaqtardyń kóptep paida bolýyna múddeli. Qazaqstan aýmaǵy arqyly tasymaldanatyn taýarlar Beijińniń negizgi tutynýshysy sanalatyn – Batys elderine teńiz tasymalyna qaraǵanda anaǵurlym erte jetedi», – deidi Áshimbaev.
