– Jetisý talanttarǵa bai ólke. Osydan jiyrma jyl buryn jerlesimiz Nurbaqyt Teńizbaev osy kúres túrinen jastar arasynda Álem chempiony boldy. Búgin onyń jolyn jalǵap, sen de álem jastary arasynda úzdik shyqtyń. Bul, birinshiden ózińniń kúsh-jigeriń men tynymsyz eńbegińniń arqasy, ekinshiden seni 7 jastan osy kúreske baýlyp, jattyqtyrǵan ákeńniń eńbeginiń jemisi.
Sen tek óz áýletińdi, Jetisý óńirin ǵana emes, Qazaqstandy álemge tanyttyń. Endi eresekter arasynda top jaryp, Olimpiada shyńyna shyǵýyńa tilektespin. Sharshamai-talmai jattyǵyp, eńbekten. Biz saǵan barlyq jaǵynan qoldaý bildirýge ázirmiz, – dedi Beibit Isabaev.
Jas sportshy ákimmen áńgimelesý barysynda Álem chempionatynyń qalai ótkenin qysqasha aityp berdi. Sol siiaqty óziniń sporttyq joly, eń myqty qarsylastarmen beldesýden keiingi túigen oilary, aldaǵy josparlary jaily baiandady.
– Jastar arasynda Álem chempiony atanǵanym tek meniń ǵana emes, elimizdiń jeńisi dep bilemin. Alda josparlarym kóp. Olardyń bárine tynbai jattyǵýdyń arqasynda jetemin dep oilaimyn, – dedi Ishar Qurbaev.
Jattyqtyrýshy Muhamet Nuǵymanov Ishardyń kelesi jyly eresekter arasynda beldesýge nietti ekenin aitty. «Ishar qazir Almatydaǵy Sport jáne týrizm akademiiasynda 3 kýrsta oqidy. Jattyǵýǵa, úlken maqsattarǵa jetýge barlyq múmkindigi bar. Kórsetken qoldaýlaryńyz úshin alǵys aitamyz», – deidi M.Nuǵymanov.
Oblys ákimi sportshy men onyń jattyqtyrýshysyna Qurmet grmotasyn usynyp, chempionǵa 1 mln. teńgeniń sertifikatyn tabystady.
Eske salsaq, Ishar Muhametuly Qurbaev 7 jastan bastap grek-rim kúresimen shuǵyldanady. Ákesi Nuǵmanov Muhamet jeke bapkeri.
Ishar Muhametuly grek-rim kúresinen Qazaqstan Respýblikasynyń sport sheberi. 2018-2019 jylǵy kadetter arasynda Álem jáne eki dúrkin Aziia chempiony. 2023 jyly eresekter arasynda grek-rim kúresinen Qazaqstan Respýblikasynyń chempiony.
Sondai-aq, 2023 jylǵy aqpan aiynda ótken Qazaqstan Respýblikasynyń VI jazǵy spartakiadasynyń kúmis júldegeri. Jýyrda Iordaniianyń Amman qalasynda grek-rim kúresinen jastar arasynda ótken Álem Chempionatynda Álem chempiony atandy.
