بۇگىن جەتىسۋ وبلىسىنىڭ اكىمى بەيبىت يسابايەۆ كۇنى كەشە يوردانيانىڭ اممان قالاسىندا گرەك-ريم كۇرەسىنەن جاستار اراسىندا الەم چەمپيونى اتاعان يسحار قۇربايەۆ پەن ونىڭ جاتتىقتىرۋشى مۇحامەت نۇعمانوۆتى قابىلدادى، – دەپ حابارلايدى جەتىسۋ وبلىسى اكىمىنىڭ باسپا ءسوز قىزمەتى.

– جەتىسۋ تالانتتارعا باي ولكە. وسىدان جيىرما جىل بۇرىن جەرلەسىمىز نۇرباقىت تەڭىزبايەۆ وسى كۇرەس تۇرىنەن جاستار اراسىندا الەم چەمپيونى بولدى. بۇگىن ونىڭ جولىن جالعاپ، سەن دە الەم جاستارى اراسىندا ۇزدىك شىقتىڭ. بۇل، بىرىنشىدەن ءوزىڭنىڭ كۇش-جىگەرىڭ مەن تىنىمسىز ەڭبەگىڭنىڭ ارقاسى، ەكىنشىدەن سەنى 7 جاستان وسى كۇرەسكە باۋلىپ، جاتتىقتىرعان اكەڭنىڭ ەڭبەگىنىڭ جەمىسى.

سەن تەك ءوز اۋلەتىڭدى، جەتىسۋ ءوڭىرىن عانا ەمەس، قازاقستاندى الەمگە تانىتتىڭ. ەندى ەرەسەكتەر اراسىندا توپ جارىپ، وليمپيادا شىڭىنا شىعۋىڭا تىلەكتەسپىن. شارشاماي-تالماي جاتتىعىپ، ەڭبەكتەن. ءبىز ساعان بارلىق جاعىنان قولداۋ بىلدىرۋگە ءازىرمىز، – دەدى بەيبىت يسابايەۆ.

جاس سپورتشى اكىممەن اڭگىمەلەسۋ بارىسىندا الەم چەمپيوناتىنىڭ قالاي وتكەنىن قىسقاشا ايتىپ بەردى. سول سياقتى ءوزىنىڭ سپورتتىق جولى، ەڭ مىقتى قارسىلاستارمەن بەلدەسۋدەن كەيىنگى تۇيگەن ويلارى، الداعى جوسپارلارى جايلى باياندادى.

– جاستار اراسىندا الەم چەمپيونى اتانعانىم تەك مەنىڭ عانا ەمەس، ەلىمىزدىڭ جەڭىسى دەپ بىلەمىن. الدا جوسپارلارىم كوپ. ولاردىڭ بارىنە تىنباي جاتتىعۋدىڭ ارقاسىندا جەتەمىن دەپ ويلايمىن، – دەدى يسحار قۇربايەۆ.



جاتتىقتىرۋشى مۇحامەت نۇعىمانوۆ يسحاردىڭ كەلەسى جىلى ەرەسەكتەر اراسىندا بەلدەسۋگە نيەتتى ەكەنىن ايتتى. «يسحار ءقازىر الماتىداعى سپورت جانە تۋريزم اكادەمياسىندا 3 كۋرستا وقيدى. جاتتىعۋعا، ۇلكەن ماقساتتارعا جەتۋگە بارلىق مۇمكىندىگى بار. كورسەتكەن قولداۋلارىڭىز ءۇشىن العىس ايتامىز»، – دەيدى م.نۇعىمانوۆ.

وبلىس اكىمى سپورتشى مەن ونىڭ جاتتىقتىرۋشىسىنا قۇرمەت گرموتاسىن ۇسىنىپ، چەمپيونعا 1 ملن. تەڭگەنىڭ سەرتيفيكاتىن تابىستادى.

ەسكە سالساق، يسحار مۇحامەت ۇلى قۇربايەۆ 7 جاستان باستاپ گرەك-ريم كۇرەسىمەن شۇعىلدانادى. اكەسى نۇعمانوۆ مۇحامەت جەكە باپكەرى.

يسحار مۇحامەت ۇلى گرەك-ريم كۇرەسىنەن قازاقستان رەسپۋبليكاسىنىڭ  سپورت شەبەرى. 2018-2019 جىلعى كادەتتەر اراسىندا الەم جانە ەكى دۇركىن ازيا  چەمپيونى. 2023 جىلى ەرەسەكتەر اراسىندا گرەك-ريم كۇرەسىنەن  قازاقستان رەسپۋبليكاسىنىڭ  چەمپيونى.

سونداي-اق، 2023 جىلعى اقپان ايىندا وتكەن قازاقستان رەسپۋبليكاسىنىڭ VI جازعى سپارتاكياداسىنىڭ   كۇمىس جۇلدەگەرى. جۋىردا يوردانيانىڭ اممان قالاسىندا گرەك-ريم كۇرەسىنەن جاستار اراسىندا وتكەن الەم چەمپيوناتىندا الەم چەمپيونى اتاندى.