Buǵan deiin birqatar telegram arnalar men álemjelilerde Tuńǵysh prezidenttiń inisi Bolat Nazarbaevtyń qaitys bolǵany habarlanǵan.
"Eks-prezidenttiń inisi uzaq ýaqyt kómei isigimen kúresip, 69 jasynda Almaty aýrýhanasynda qaitys boldy" degen edi derekkóz Nazarbaevtyń qyzy Gúlmira Ábishevaǵa siltep.
"Aýyr jáne uzaqqa sozylǵan syrqattan keiin ákemiz dúnieden ótti. Álemniń qalai jumys isteitinin tereń túsinetin, kóp nárseni boljai biletin jarqyn, talantty, qamqor jan", - degen Ábishevanyń málimdemesin JQ telegram-kanaly taratqan-tuǵyn.
Artynsha bul aqparatty Nazarbaev aǵaiyn-týystary teriske shyǵardy.
"Barlyǵy jaqsy, alań bolmańyzdar. Onyń beti beri qarap keledi. Qaitys bolǵany týraly alyp-qashpa áńgimelerge senbeýge shaqyramyz", – dedi Bolat Nazarbaevtyń týys-týǵandary.
Óz kezeginde Almaty qalasynyń Densaýlyq basqarmasy da Bolat Nazarbaevtyń ómirden ótkeni týraly aqparatty rastamady.
Qoǵamda Bolat Nazarbaevtyń syrqat ekenine kúmánmen qaraityndar kóp. Buǵan deiin Dalanews.kz-ke pikir bildirgen belgili jýrnalist Ibrash Núsipbaev "tósek tartyp jatqan adamnyń Qańtar qyrǵyny kezinde Bishkekke jol júrip, artynan Dýbaiǵa ushýy múmkin emesin" aitqan.
"Qyrǵyzstannyń shekara qyzmetiniń málim etkenindei Bolat Nazarbaev 2022 jyldyń 6 qańtarynda tańǵy saǵat 05:30 shamasynda “Aq jol” baqylaý-ótkizý pýnktinen óz aiaǵymen ótip, 7 qańtarda Bishkek áýejaiy arqyly Dýbaiǵa ushyp ketken. Onyń dál sol kúni Dýbaidy betke alǵanyn Flightradar24 servisi de rastaidy", – degen edi áriptesimiz.
Al qoǵam belsendisi Arman Shoraev: "Nazarbaev eshqandai aýrýmen, eshqandai qaterli isikpen aýyryp jatqan joq.
Bizdiń halqymyz keshirimdi bolǵandyqtan olar ózderiniń aram piǵyldaryn iske asyryp, “bizdi aiasyn” dep osylai jasap otyr.
Bolat ta, onyń balalary da myńdaǵan qazaqtardyń kóz jasy men obalyna qalǵandaryn biledi. Olar osyndai amal-ailamen ózderin jaýapkershilikten aman alyp qalǵysy keledi", – degen pikir bildirgen.
https://dalanews.kz/del-qazir/79742-bolat-nazarbaev-sap-sau-ol-zhauapkershi
