«Besobanyń» aty ózgergenimen máselesi sheshilmegen. 100 otbasy úisiz júr.
Kesken terektei qulap túsken «Besobadaǵy» turǵyn úi esterińizde shyǵar. Ol oqiǵadan beri bes jyl ótti. Jyldar boiy tirnektep aqsha jinap, armandap jetken páterlerinen bir sátte aiyrylǵan 100-den astam otbasy áli úisiz júrgenin 31 arna tilshileri habarlady. Olardyń kómek surap barmaǵan jerleri joq. Banktegi qaryzdary bolsa kún saiyn ósip jatyr. Amaly qalmaǵan jurt, aqyry sotqa júgingen.
Bes jyl boiy baspanasyz júrgen «besobalyqtar» ákimdikti qoiyp, endi sot tabaldyryǵyn tozdyryp júr.
Bilik ókilderinen sot arqyly páter daýlaǵandardyń ishinde tórt birdei kireberisi qulap, qatty zaqym kelgen kórshiles úidiń turǵyndary da bar. Dáýren Qydyrbaev jańa úiinde eki-aq jyl turǵanyn aitady. Azamat apatty dep tanylǵan úiinen shyǵarylǵannan keiin baspana úshin alǵan nesiesin tólei almai, qaryzǵa belsheden batqanyn aitty.
– Bes jyl boldy. Bizdiń Qaraǵandy siiaqty úlken qalaǵa endi uiat mynandai jaǵdai, – deidi Dáýren Qydyrbaev.
Bútin bir úii jermen jeksen bolǵannan keiin aty «Besobadan» «Shapaǵatqa» aýystyrylǵan turǵyn úi kesheninen biliktegiler eki júz turǵynǵa baspana úlestirip bergen. Al qalǵan 119 adamnyń teń jartysy óz aqshalaryna páter jaldap júr. Óitkeni osydan bes jyl buryn bastalǵan qurylys jumystary sozbaqqa salynyp, áli de aiaqtalmaǵan.
– Qarajattyń joqtyǵy men merdigerlerdiń salǵyrttyǵynan birneshe ret toqtaǵan qurylys búginde qaita jandandy. Degenmen jumystar áli de jeterlik. Óitkeni, sheneýnikterdiń sózinshe, myna turǵan tórt sektsiianyń shatyrlary áli de bekitilmegen. Degenmen atqaminerler jumystar sátti aiaqtalsa, baspanalar eki aidyń ishinde qoldanysqa beriledi dep otyr, – deidi 31 arnanyń tilshisi Meiramgúl Salqymbaeva. Al Qaraǵandy qalalyq turǵyn úi qatynastary bólimi basshysynyń orynbasary Sáljan Balaýbaev:
– Qazirgi tańda «besobalyqtardyń» jartysyna úi berildi, qazir taǵy bir úi salynyp jatyr. Qurylys aiaqtalǵan kezde qalǵan 119 otbasyna páter beremiz. Ázirge eshqandai qiyndyqtar týyndaǵan joq, – deidi.
Qiyndyq týdyrmai, «bes jylǵa sozylǵan» qurylysty mamyr aiynda aiaqtaýdy kózdegen shendiler, «ásirese №11 turǵyn úidegi jumystar kóp», deidi. Úidiń syrty tolyq qaptalmaǵanynan buryn, ishki jumystary da jeterlik. Biraq qarjydan qiyndyq joq degen atqaminerler bul joly jumystar ýaqytyly tapsyrylatynyn aitady. Al bes jyl boiy páter zardabyn tartqan besobalyqtardyń biliktiń ýádelerine sengisi joq.
