كەسكەن تەرەكتەي قۇلاپ تۇسكەن «بەسوباداعى» تۇرعىن ءۇي ەستەرىڭىزدە شىعار. ول وقيعادان بەرى بەس جىل ءوتتى. جىلدار بويى تىرنەكتەپ اقشا جيناپ، ارمانداپ جەتكەن پاتەرلەرىنەن ءبىر ساتتە ايىرىلعان 100-دەن استام وتباسى ءالى ءۇيسىز ءجۇرگەنىن 31 ارنا تىلشىلەرى حابارلادى. ولاردىڭ كومەك سۇراپ بارماعان جەرلەرى جوق. بانكتەگى قارىزدارى بولسا كۇن سايىن ءوسىپ جاتىر. امالى قالماعان جۇرت، اقىرى سوتقا جۇگىنگەن.
بەس جىل بويى باسپاناسىز جۇرگەن «بەسوبالىقتار» اكىمدىكتى قويىپ، ەندى سوت تابالدىرىعىن توزدىرىپ ءجۇر.
بيلىك وكىلدەرىنەن سوت ارقىلى پاتەر داۋلاعانداردىڭ ىشىندە ءتورت بىردەي كىرەبەرىسى قۇلاپ، قاتتى زاقىم كەلگەن كورشىلەس ءۇيدىڭ تۇرعىندارى دا بار. داۋرەن قىدىربايەۆ جاڭا ۇيىندە ەكى-اق جىل تۇرعانىن ايتادى. ازامات اپاتتى دەپ تانىلعان ۇيىنەن شىعارىلعاننان كەيىن باسپانا ءۇشىن العان نەسيەسىن تولەي الماي، قارىزعا بەلشەدەن باتقانىن ايتتى.
– بەس جىل بولدى. ءبىزدىڭ قاراعاندى سياقتى ۇلكەن قالاعا ەندى ۇيات مىنانداي جاعداي، – دەيدى داۋرەن قىدىربايەۆ.
ءبۇتىن ءبىر ءۇيى جەرمەن جەكسەن بولعاننان كەيىن اتى «بەسوبادان» «شاپاعاتقا» اۋىستىرىلعان تۇرعىن ءۇي كەشەنىنەن بيلىكتەگىلەر ەكى ءجۇز تۇرعىنعا باسپانا ۇلەستىرىپ بەرگەن. ال قالعان 119 ادامنىڭ تەڭ جارتىسى ءوز اقشالارىنا پاتەر جالداپ ءجۇر. ويتكەنى وسىدان بەس جىل بۇرىن باستالعان قۇرىلىس جۇمىستارى سوزباققا سالىنىپ، ءالى دە اياقتالماعان.
– قاراجاتتىڭ جوقتىعى مەن مەردىگەرلەردىڭ سالعىرتتىعىنان بىرنەشە رەت توقتاعان قۇرىلىس بۇگىندە قايتا جانداندى. دەگەنمەن جۇمىستار ءالى دە جەتەرلىك. ويتكەنى، شەنەۋنىكتەردىڭ سوزىنشە، مىنا تۇرعان ءتورت سەكسيانىڭ شاتىرلارى ءالى دە بەكىتىلمەگەن. دەگەنمەن اتقامىنەرلەر جۇمىستار ءساتتى اياقتالسا، باسپانالار ەكى ايدىڭ ىشىندە قولدانىسقا بەرىلەدى دەپ وتىر، – دەيدى 31 ارنانىڭ ءتىلشىسى مەيرامگۇل سالقىمبايەۆا. ال قاراعاندى قالالىق تۇرعىن ءۇي قاتىناستارى ءبولىمى باسشىسىنىڭ ورىنباسارى ءسالجان بالاۋبايەۆ:
– قازىرگى تاڭدا «بەسوبالىقتاردىڭ» جارتىسىنا ءۇي بەرىلدى، ءقازىر تاعى ءبىر ءۇي سالىنىپ جاتىر. قۇرىلىس اياقتالعان كەزدە قالعان 119 وتباسىنا پاتەر بەرەمىز. ازىرگە ەشقانداي قيىندىقتار تۋىنداعان جوق، – دەيدى.
قيىندىق تۋدىرماي، «بەس جىلعا سوزىلعان» قۇرىلىستى مامىر ايىندا اياقتاۋدى كوزدەگەن شەندىلەر، «اسىرەسە №11 تۇرعىن ۇيدەگى جۇمىستار كوپ»، دەيدى. ءۇيدىڭ سىرتى تولىق قاپتالماعانىنان بۇرىن، ىشكى جۇمىستارى دا جەتەرلىك. ءبىراق قارجىدان قيىندىق جوق دەگەن اتقامىنەرلەر بۇل جولى جۇمىستار ۋاقىتىلى تاپسىرىلاتىنىن ايتادى. ال بەس جىل بويى پاتەر زاردابىن تارتقان بەسوبالىقتاردىڭ بيلىكتىڭ ۋادەلەرىنە سەنگىسى جوق.
