Memleket basshysy Qasym-Jomart Toqaev Sheteldik investorlar keńesiniń 37-shi plenarlyq otyrysyn ótkizdi, dep habarlaidy Dalanews.kz.
Prezident Sheteldik investorlar keńesi memleket pen onyń halyqaralyq seriktesteri arasyndaǵy strategiialyq yqpaldastyqtyń senimdi platformasy retinde aldaǵy ýaqytta da qyzmet kórsete beretinin atap ótti.
“Atalǵan forým jiyrma jyldan astam ýaqyt boiy Qazaqstanda investitsiiaǵa baǵdarlanǵan ekojúie qalyptastyrýda mańyzdy ról atqaryp keledi. Biz Keńestiń belsendi qatysýymen elimizde investitsiialyq ahýaldy jaqsartýǵa, ashyqtyqty arttyrýǵa jáne kásipkerlik júrgizý sharttaryn jeńildetýge baǵyttalǵan keshendi reformalardy odan ári jalǵastyrýǵa niettimiz”, – dedi Memleket basshysy.
Prezidenttiń aitýynsha, sarapshylar taiaý jyldary jahandyq IJÓ ósimi shamamen 2,9 paiyzǵa deiin baiaýlaitynyn boljap otyr.
“Búginde infliatsiialyq qysymnyń kúsheigeni, jahandyq jetkizý tizbegindegi kedergilerdiń jáne iskerlik ortadaǵy baǵdarsyzdyqtyń artqany baiqalady. Mundai úrdister álem ekonomikasynyń perspektivasyn nasharlata túsýi yqtimal. Bul halyqaralyq syndarly dialogtyń qajet ekenin kórsetedi. Qazaqstan sekildi elderdiń ekonomikasy osyndai syn-qaterler kezinde syrtqy daǵdarystarǵa tótep bere aldy. Biylǵy bes aida Qazaqstan ekonomikasy 6 paiyzǵa ósti. Oǵan kólik jáne logistika, qurylys, saýda, taý-ken ónerkásibi jáne óńdeý salalary kóp úles qosty”, – dedi Prezident.
Qasym-Jomart Toqaevtyń pikirinshe, Qazaqstannyń strategiialyq turǵydan ornalasýy, adami kapitaly jáne reformalardy jan-jaqty júrgizýi investorlarǵa da, ulttyq ekonomikaǵa da mol múmkindik beredi.
Prezident investorlardyń máselesin "osy jerde jáne dál qazir" qaǵidaty boiynsha jedel sheshýge baǵyttalǵan Investitsiialyq shtab qyzmetine toqtaldy. Atalǵan shtab 70 milliard dollardy quraityn 137 investitsiialyq jobaǵa qoldaý kórsetti. Sondai-aq zańnamaǵa investorlardyń problemasyn júieli túrde sheshýdi kózdeitin 140 túzetý engizýge bastamashy boldy.
