Abai oblysynyń ákimi Berik Ýáli Semei qalasyndaǵy mektep oqýshylary arasyndaǵy kikiljińge bailanysty jiyn ótkizdi. Jiynǵa prokýratýra, politsiia departamenti, Bilim basqarmasy basshylary jáne bala quqyqtaryn qorǵaý jónindegi ýákil qatysty,- dep habarlaidy Dalanews.kz
Qazirgi tańda oqiǵaǵa qatysty sotqa deiingi tergeý bastaldy. Kámeletke tolmaǵandardyń quqyqtaryn qorǵaý jónindegi komissiianyń sheshimimen janjalǵa qatysqan tórt oqýshyny arnaiy mektepke jiberý usynyldy. Sonymen qatar bala tárbiesine nemquraily qaraǵany úshin olardyń ata-analaryn ata-ana quqyǵynan aiyrý týraly talap-aryz berildi. Ákimshilik jáne qylmystyq quqyq buzýshylyqtar boiynsha oqýshylardyń zańdy ókilderi jaýapqa tartyldy. Jábirlenýshige oblystyq psihologiialyq qoldaý ortalyǵynyń mamandary kómek kórsetip jatyr.
Abai oblysynyń Bilim basqarmasy janynan arnaiy monitoringtik top quryldy. Qazirgi ýaqytta basqarma tarapynan qyzmettik tekseris júrgizilýde. Onyń qorytyndysy boiynsha mektep basshylyǵynyń tárbie jáne baqylaý jumysyndaǵy jaýapkershiligi qaralady.
Oblys ákimi jiyn barysynda mundai oqiǵalardyń qaitalanbaýy úshin aldyn alý jumysyn kúsheitýdi tapsyrdy.
«Oblystaǵy barlyq mektep qatań baqylaýda bolýy tiis. Bilim basqarmasy quqyq qorǵaý organdarymen birge oqýshylarmen jáne olardyń ata-analarymen túsindirme jumystaryn júieli túrde júrgizý qajet. Óńirdegi mektepterdiń qaýip-qater kartasy jasalyp, osyndai jaǵdailar kezinde jedel ári úilesimdi áreket etýge arnalǵan naqty is-sharalar algoritmi daiyn bolýy kerek», – dedi aimaq basshysy.
Sonymen qatar oblys ákimi oqiǵaǵa bailanysty qyzmettik tekseris júrgizip, jaýapty tulǵalardy tártiptik jaýapkershilikke tartýdy tapsyrdy.
