Abai oblysynyń ákimi Berik Ýáli oblystyq máslihat depýtattarymen kezdesti. Kezdesý barysynda óńirdegi ózekti máseleler talqylanyp, aimaqtyń damýyna qatysty usynys-pikirler ortaǵa salyndy,- dep habarlaidy Dalanews.kz
Kezdesýde sóz alǵan oblys ákimi alda aýqymdy mindet turǵanyn, mejelengen joba-josparlar kóp ekenin, bul rette máslihat pen jergilikti biliktiń qoian-qoltyq jumys isteýiniń mańyzy zor ekenin atap ótti.
«Shákárim atamyzdyń «Adamdyq boryshyń – halqyńa qyzmet qyl» degen tereń maǵynaly sózi árbirimizdiń azamattyq ustanymymyzǵa ainalýy tiis. Búgingi tańda óńirimiz úshin jaýapkershilik júgi zor. «Jumyla kótergen júk jeńil» demekshi, oblysymyzdyń turaqty damýyn qamtamasyz etý – ortaq paryz. Qazaq rýhaniiatynyń altyn besigi sanalǵan, elimizdiń tarihi ortalyǵyna ainalǵan qasietti Semeidiń ósip-órkendeýine bárimiz birlese úles qosýymyz qajet»,- dedi aimaq basshysy.
Oblys ákimi óńirde buǵan deiin bastalǵan jumystyń barlyǵy jalǵasatynyn, ásirese aýyl sharýashylyǵy, óndiris, týrizm, kólik-logistika salalaryna, investitsiia tartýǵa, infraqurylymdyq jobalarǵa erekshe kóńil bólinetinin jetkizdi. Aimaqtyń týristik áleýetin kóterý úshin aldaǵy ýaqytta Týrizm basqarmasy qurylady. Oblystyń logistikalyq múmkindigin arttyrý úshin ainalma joldardy salýǵa basymdyq berilip, «Báiterek» ulttyq basqarýshy holdingi, basqa da qurylymdar arqyly qarjy tartýǵa den qoiylatynyn aitty.
Depýtattar óńirdiń aýyl sharýashylyǵyn kóterýge, shaǵyn qalalardy damytýǵa, oblys ortalyǵyndaǵy kóshelerdi abattandyrýǵa, Semei synaq poligonynyń zardaptaryn joiýǵa, aýyldarǵa meditsinalyq mamandardy tartýǵa qatysty usynys-pikirlerin ortaǵa saldy.
Oblys ákimi kezdesýdegi usynys-pikirler eskerilip, qazir ázirlenip jatqan óńirdiń arnaiy keshendi baǵdarlamasyna engiziletinin atap ótti.
«Ózderińizben birlesip qolǵa alatyn jumys kóp. Qazir shet eldik, otandyq investorlardy shaqyryp, kúndelikti qabyldap jatyrmyn. Semeige bes juldyzdy qonaqúi salý boiynsha kelissóz júrgizip jatyrmyz. Alǵashqy kelisim bar. Depýtattardyń arasynda kásipkerlerdiń de bar ekenin jaqsy bilemin. Sizderdi Semei qalasynyń gúldenýine, kórkeiýine atsalysýǵa shaqyramyn. Biznestiń áleýmettik jaýapkershiligi aiasynda týǵan jerdi túletýge úles qosyńyzdar. Oblysymyzdy birlese órkendeteiik»,- dedi oblys ákimi.
