Shymkent ákiminiń orynbasary Rýslan Berdenovke taǵy bir ota jasalady, dep habarlaidy Dalanews.kz.
Bul týraly onyń ókili Jeńis Tynybek málimdedi.
Onyń aitýyna qaraǵanda, qazir Rýslan Berdenov Almatydaǵy klinikalardyń birinde emdelip jatyr. Jeńis Tynybektiń sózinshe, Berdenovke ekinshi otany 13 tamyzda jasaý josparlanyp otyr.
"Berdenovke erteń ota jasalady. Ota barysynda onyń denesinde qalǵan myltyq bytyrasy alynady", - dedi Tynybek Tengrinews.kz-ke.
Buǵan deiingi jaǵdai
Eske salaiyq, buǵan deiin Rýslan Berdenov sotqa kelýge mindettelgeni habarlandy. Sot otyrysynda sýdia Ábinur Qarabaev Rýslan Berdenovti 6 tamyzǵa josparlanǵan negizgi sot protsesine mindetti túrde qatysýǵa shaqyrdy.
Sebebi Rýslan Berdenov aldyn ala tyńdaýǵa ózi kelmegen edi. Onyń ókili Rýslan Berdenov em qabyldap jatqanyn málimdedi.
Ákimdik mańyndaǵy atys týraly
21 sáýirde Shymkent qalasy ákimdigi ǵimaraty mańynda atys boldy. Saldarynan Rýslan Berdenov jaraqat aldy. Artynsha kúdikti ustalyp, ýaqytsha ustaý izoliatoryna qamaldy, bul derek boiynsha qylmystyq is qozǵaldy.
Bul is boiynsha basty kúdikti - Ernar Jiembai. Ashyq formatta ótken aldyn ala tyńdaý kezinde sýdia Jiembaidyń sot protsesi barysynda ózin túsirýge qarsy ekenin jetkizdi.
