21 sáýirde Shymkentte Rýslan Berdenovke shabýyl jasaldy. Kásipten depýtattyqqa, depýtattyqtan ákimdikke oiysqan "Betmen" sheneýnik týraly ne belgili? Partiialastary ne deidi? Dalanews.kz sholý jasap shyqty.
Ákimdik mańyndaǵy atys: sheneýnikke shabýyl jasaldy
Keshe Shymkent qalasy ákimdigi ǵimaraty mańynda atys boldy. Saldarynan Rýslan Berdenov jaraqat aldy. Politsiia málimetinshe, kúdikti ustalyp, ýaqytsha ustaý izoliatoryna qamalǵan, bul derek boiynsha qylmystyq is qozǵalǵan.
Al Densaýlyq saqtaý ministrligi málimetinshe, Rýslan Berdenovke operatsiia jasalǵan, ómirine qaýip joq.
"Shymkent qalasy ákiminiń orynbasary oq jaraqatymen qalalyq aýrýhanaǵa tústi. Oǵan shuǵyl operatsiia jasaldy. Operatsiia barysynda qan ketý toqtatyldy, zaqym qalpyna keltirildi. Ómirine qaýip joq", - dep jazylǵan habarlamada.
Málimetke súiensek, onyń jaǵdaiy turaqty aýyr dep baǵalanady. Sheneýnik dárigerlerdiń turaqty baqylaýynda jáne qajet meditsinalyq kómekti alyp jatyr.
BAQ pen áleýmettik jeli shabýyl týraly ne jazdy?
Jelide Shymkent ákiminiń orynbasary Rýslan Berdenovke jasalǵan shabýyl týraly túrli boljam aityldy. Sonyń birinde shabýyl turmystyq sebepten jasalǵany, dálirek aitsaq, jeke sebeptermen ekeni aityldy, tipti qyzǵanyshtan bolýy múmkin delindi.
Rýslan Berdenovtiń partiialasy Beibit Álibekov shabýyl "ol Shymkenttegi qurylys salasynda tártip ornatýyna bailanysty jasalǵan bolýy múmkin" dep sanaidy. Álibekovtiń sózinshe, atqan adam Berdenovtiń qol astyndaǵy qyzmetker, iaǵni ákimdik janyndaǵy JShS qyzmetkeri bolǵan.
Al Shymkent qalasynyń Ishki saiasat jáne jastar isteri basqarmasynyń basshysy Áigerim Jumaǵulova ustalǵan adamnyń jubaiymen Politsiia departamenti ǵimaratynda kezdeskenin málimdedi. Ustalǵan adamnyń jubaiy Rýslan Berdenovpen tanys emes ekenin aitqan.
Shymkent ákimdigi de jelidegi aqparat shyndyqqa janaspaitynyn málimdegen.
Partiialastary Berdenovke jasalǵan shabýyl týraly qandai pikirde?
"Respublica partiiasy bul oqiǵaǵa bailanysty ókinish bildiredi jáne partiialasymyz Rýslan Arysbekuly Berdenovke tez arada saýyǵyp ketýin tileidi. Oqiǵanyń mán-jaiyna qatysty biz de barsha jurtshylyq siiaqty quzyrly organdardyń resmi túsiniktemesin kútemiz. Tergeý barysyna aralasý retinde qabyldanýy múmkin kez kelgen aldyn ala pikir bildirýden biz aýlaqpyz. Biz tergeý men sot protsesteri ádil de obektivti ótetinine senimdimiz. Respublica partiiasy kez kelgen daýly jaǵdai zań aiasynda sheshilýge tiis dep esepteidi. Qandai da bir kúsh kórsetý - biz úshin jat", - dep jazylǵan habarlamada.
Rýslan Berdenov - Shymkenttiń týmasy. Ol 1985 jyly 6 naýryzda Shymkent qalasynda dúniege kelgen. 2006 jyly menedjment mamandyǵy boiynsha ál-Farabi atyndaǵy Qazaq ulttyq ýniversitetin bitirgen. 2009 jyly KIMEP ýniversitetin Iskerlik basqarý magistri (MBA) dárejesimen bitirdi.
Biraz ýaqyt jeke kompaniialarda jumys istegen, atap aitsaq:
- Eńbek jolyn 2005 jyly "Almaty qus" AAQ ("Seimar" toby) kompaniiasynyń bólshek saýda direktory qyzmetinen bastady.
- 2007 jylǵy aqpan - 2010 jylǵy shilde Procter & Gamble kompaniiasynyń bas logistikalyq úilestirýshisi.
- 2010 jylǵy shilde - 2012 jylǵy qarasha Eastcomtrans JShS jyljymaly quramdy jaldaý bóliminiń bastyǵy.
- 2012 jylǵy qarasha - 2018 jylǵy mamyr "Aq niet" JShS bas direktory.
- 2018 jylǵy qarasha - 2019 jylǵy sáýir "Aq niet" JShS baiqaý keńesiniń múshesi.
- 2019 jylǵy sáýir - 2023 jylǵy naýryz Aq niet Group baiqaý keńesi tóraǵasynyń orynbasary.
Eki jyl buryn Berdenovtiń saiasi arenadaǵy karerasy bastaldy. 2023 jylǵy 29 naýryzdan bastap Respublica partiiasynyń partiialyq tizimi boiynsha VIII sailanǵan Qazaqstan Respýblikasy Parlamenti Májilisiniń depýtaty, Qarjy jáne biýdjet komitetiniń múshesi boldy da, 2023 jylǵy naýryzdan bastap VIII sailanǵan Qazaqstan Respýblikasy Parlamenti Májilisiniń depýtaty bolyp Respublica partiiasynyń partiialyq tizimi boiynsha sailandy.
Májilis minberinde Berdenovtiń esimi býkmekerlermen kúres arqyly este qaldy. Keiin tipti bul másele sotqa deiin jetti. Artynsha sot depýtat Rýslan Berdenovtiń ústinen shaǵymdanǵan býkmekerlik keńselerdiń talabyn qanaǵattandyrýdan bas tartty. Odan soń nashaqorlyq pen esirtki biznesine qarsy kúreske baǵyttalǵan bes jyldyq keshendi josparǵa ózgerister engizý qajet ekenin málimdedi. Bir kezderi QTJ-ǵa da shúiligip, kompaniia qyzmetine alańdaýshylyq bildirip, sybailas jemqorlyq tetikteri jáne milliardtaǵan shyǵyndar týraly aitty.
Eki jylǵa jýyq depýtattyq qyzmet atqarǵan ol biyl aqpanda Shymkent qalasy ákiminiń orynbasary bolyp taǵaiyndaldy.
Berdenovtiń artynda kim tur?
Buǵan deiin arnalardyń birine bergen suhbatynda Rýslan Berdenov Shymkentke qyzmet aýystyrýynyń túpki sebebi nede ekenin aitqan edi.
"Shymkenttiń ákimi bolý degen ambitsiiam joq. Osy suraq aldyńǵy jyly da suralǵan. Ózim Shymkenttiki bolǵannan keiin bálkim solai aitatyn shyǵar. Biraq eshqashan da eshkimge ol nárse týraly aitpadym. Shynymdy aitsam, báribir. Ulytaýǵa barsaq ta, BQO-ǵa barsaq ta, qai jaqqa barsaq ta durys jumys kórsetip, nátije shyǵarý -maqsatymyz", - dedi ol Ulysmedia-ǵa bergen suhbatynda.
Suhbat barysynda Berdenovke "dushpandaryńyz bar ekenin sezesiz be?" degen suraq qoiylǵan.
"Árine, sezemin. Sebebi úlken máseleni qozǵaǵannan keiin ol máselede múddeli toptar bar ekenin bilemin. Múddeli toptar, tulǵalar bar eken bilemin. ("Shymkentte de aiaqtan shalatyndar bolmai ma?" degen saýal qoiyldy). Jas bala emespin, barlyq jerde meni eshkim qushaq jaiyp kútpeidi. Ol kásipkerlikte de sondai. Eshkim seni qushaq jaiyp kútip otyrmaidy. Kelispeitinder bolady, qarsy shyǵatyndar bolady. Alysqa barmaiyqshy, paiǵambarlardyń ózine qarsy shyqqandar kóp boldy ǵoi. Biz kimbiz? Men áýlie emespin, minsiz adam emespin. Paiǵambar emespin. Ol - jumystyń bir bóligi, men solai qabyldaimyn. Oǵan shydai bilý kerek", - dedi ol.
Sonymen qatar, Rýslan Berdenov Shymkent ákimi Ǵabit Syzdyqbekovpen qashannan beri tanys ekenin de aitty.
"Qazirgi Shymkenttiń ákimi Ǵabit myrza keremet jumys istep jatyr. Shymkent - jemqorlyqty toqtatqan eń birinshi qalalardyń biri. Senseńiz de, senbeseńiz de sol. ...Ǵabit myrzany ómirimde úsh ret kórgen shyǵarmyn. Janashyr retinde ártúrli jobamdy aittym, ekeýmiz aqyldastyq, ol da janashyr. Úsh ret kezdestik, bir saǵattan otyryp aqyldastyq. Men óz oiymdy aittym. Ol kisi "Rýslan, osy jobalardy júzege asyrsań, men qolymnan kelgen barlyǵyn jasaimyn, ózińniń eliń ǵoi, kel de osyny jasa" dedi", - deidi ol.
Sheneýnik Berdenov suhbatynda oligarh Qairat Itemgenovtiń qoldaýyna qalai ie bolǵanyn da aitqan edi.
"2018 jyly sol kisige kompaniiany júz paiyz satqan bolatynbyz. Satqan kezde tanystyq. Men AQSh-qa kóshtim. Úsh-tórt aidan keiin ol kisi habarlasyp, "shai isheiik, bir-eki másele bar" dedi. Búkil jumysty sol kisiniń adamdaryna tapsyrǵanmyn. Ol kisi "óte qiyn sala eken, farmatsevtika salasynda júrgen adamdar ári qarai jumys istegeni durys siiaqty, usynys retinde keliseiikshi, men ózimniń komandamdy alamyn, sen ózińniń komandańmen kelesiń, osyny basqar, meniń maqsatym - osy salany damytý" dedi. Men kelistim. Eshqandai rýlas ta emespiz. Ol kisi Semeidiki, men Shymkenttenmin. Buryn aralasymyz bolmaǵan", - dedi ol suhbatynda.
