21 ساۋىردە شىمكەنتتە رۋسلان بەردەنوۆكە شابۋىل جاسالدى. كاسىپتەن دەپۋتاتتىققا، دەپۋتاتتىقتان اكىمدىككە ويىسقان "بەتمەن" شەنەۋنىك تۋرالى نە بەلگىلى؟ پارتيالاستارى نە دەيدى؟ Dalanews.kz شولۋ جاساپ شىقتى.
اكىمدىك ماڭىنداعى اتىس: شەنەۋنىككە شابۋىل جاسالدى
كەشە شىمكەنت قالاسى اكىمدىگى عيماراتى ماڭىندا اتىس بولدى. سالدارىنان رۋسلان بەردەنوۆ جاراقات الدى. پوليسيا مالىمەتىنشە، كۇدىكتى ۇستالىپ، ۋاقىتشا ۇستاۋ يزولياتورىنا قامالعان، بۇل دەرەك بويىنشا قىلمىستىق ءىس قوزعالعان.
ال دەنساۋلىق ساقتاۋ مينيسترلىگى مالىمەتىنشە، رۋسلان بەردەنوۆكە وپەراسيا جاسالعان، ومىرىنە ءقاۋىپ جوق.
"شىمكەنت قالاسى اكىمىنىڭ ورىنباسارى وق جاراقاتىمەن قالالىق اۋرۋحاناعا ءتۇستى. وعان شۇعىل وپەراسيا جاسالدى. وپەراسيا بارىسىندا قان كەتۋ توقتاتىلدى، زاقىم قالپىنا كەلتىرىلدى. ومىرىنە ءقاۋىپ جوق"، - دەپ جازىلعان حابارلامادا.
مالىمەتكە سۇيەنسەك، ونىڭ جاعدايى تۇراقتى اۋىر دەپ باعالانادى. شەنەۋنىك دارىگەرلەردىڭ تۇراقتى باقىلاۋىندا جانە قاجەت مەديسينالىق كومەكتى الىپ جاتىر.
ب ا ق پەن الەۋمەتتىك جەلى شابۋىل تۋرالى نە جازدى؟
جەلىدە شىمكەنت اكىمىنىڭ ورىنباسارى رۋسلان بەردەنوۆكە جاسالعان شابۋىل تۋرالى ءتۇرلى بولجام ايتىلدى. سونىڭ بىرىندە شابۋىل تۇرمىستىق سەبەپتەن جاسالعانى، دالىرەك ايتساق، جەكە سەبەپتەرمەن ەكەنى ايتىلدى، ءتىپتى قىزعانىشتان بولۋى مۇمكىن دەلىندى.
رۋسلان بەردەنوۆتىڭ پارتيالاسى بەيبىت الىبەكوۆ شابۋىل "ول شىمكەنتتەگى قۇرىلىس سالاسىندا ءتارتىپ ورناتۋىنا بايلانىستى جاسالعان بولۋى مۇمكىن" دەپ سانايدى. الىبەكوۆتىڭ سوزىنشە، اتقان ادام بەردەنوۆتىڭ قول استىنداعى قىزمەتكەر، ياعني اكىمدىك جانىنداعى ج ش س قىزمەتكەرى بولعان.
ال شىمكەنت قالاسىنىڭ ءىشكى ساياسات جانە جاستار ىستەرى باسقارماسىنىڭ باسشىسى ايگەرىم جۇماعۇلوۆا ۇستالعان ادامنىڭ جۇبايىمەن پوليسيا دەپارتامەنتى عيماراتىندا كەزدەسكەنىن مالىمدەدى. ۇستالعان ادامنىڭ جۇبايى رۋسلان بەردەنوۆپەن تانىس ەمەس ەكەنىن ايتقان.
شىمكەنت اكىمدىگى دە جەلىدەگى اقپارات شىندىققا جاناسپايتىنىن مالىمدەگەن.
پارتيالاستارى بەردەنوۆكە جاسالعان شابۋىل تۋرالى قانداي پىكىردە؟
"Respublica پارتياسى بۇل وقيعاعا بايلانىستى وكىنىش بىلدىرەدى جانە پارتيالاسىمىز رۋسلان ارىسبەك ۇلى بەردەنوۆكە تەز ارادا ساۋىعىپ كەتۋىن تىلەيدى. وقيعانىڭ ءمان-جايىنا قاتىستى ءبىز دە بارشا جۇرتشىلىق سياقتى قۇزىرلى ورگانداردىڭ رەسمي تۇسىنىكتەمەسىن كۇتەمىز. تەرگەۋ بارىسىنا ارالاسۋ رەتىندە قابىلدانۋى مۇمكىن كەز كەلگەن الدىن الا پىكىر بىلدىرۋدەن ءبىز اۋلاقپىز. ءبىز تەرگەۋ مەن سوت پروسەستەرى ءادىل دە وبەكتيۆتى وتەتىنىنە سەنىمدىمىز. Respublica پارتياسى كەز كەلگەن داۋلى جاعداي زاڭ اياسىندا شەشىلۋگە ءتيىس دەپ ەسەپتەيدى. قانداي دا ءبىر كۇش كورسەتۋ - ءبىز ءۇشىن جات"، - دەپ جازىلعان حابارلامادا.
رۋسلان بەردەنوۆ - شىمكەنتتىڭ تۋماسى. ول 1985 جىلى 6 ناۋرىزدا شىمكەنت قالاسىندا دۇنيەگە كەلگەن. 2006 جىلى مەنەدجمەنت ماماندىعى بويىنشا ءال-فارابي اتىنداعى قازاق ۇلتتىق ۋنيۆەرسيتەتىن بىتىرگەن. 2009 جىلى كيمەپ ۋنيۆەرسيتەتىن ىسكەرلىك باسقارۋ ماگيسترى (MBA) دارەجەسىمەن ءبىتىردى.
ءبىراز ۋاقىت جەكە كومپانيالاردا جۇمىس ىستەگەن، اتاپ ايتساق:
- ەڭبەك جولىن 2005 جىلى "الماتى قۇس" ااق ("سەيمار" توبى) كومپانياسىنىڭ بولشەك ساۋدا ديرەكتورى قىزمەتىنەن باستادى.
- 2007 جىلعى اقپان - 2010 جىلعى شىلدە Procter & Gamble كومپانياسىنىڭ باس لوگيستيكالىق ۇيلەستىرۋشىسى.
- 2010 جىلعى شىلدە - 2012 جىلعى قاراشا Eastcomtrans ج ش س جىلجىمالى قۇرامدى جالداۋ ءبولىمىنىڭ باستىعى.
- 2012 جىلعى قاراشا - 2018 جىلعى مامىر "اق نيەت" ج ش س باس ديرەكتورى.
- 2018 جىلعى قاراشا - 2019 جىلعى ءساۋىر "اق نيەت" ج ش س بايقاۋ كەڭەسىنىڭ مۇشەسى.
- 2019 جىلعى ءساۋىر - 2023 جىلعى ناۋرىز Aq niet Group بايقاۋ كەڭەسى ءتوراعاسىنىڭ ورىنباسارى.
ەكى جىل بۇرىن بەردەنوۆتىڭ ساياسي ارەناداعى كارەراسى باستالدى. 2023 جىلعى 29 ناۋرىزدان باستاپ Respublica پارتياسىنىڭ پارتيالىق ءتىزىمى بويىنشا VIII سايلانعان قازاقستان رەسپۋبليكاسى پارلامەنتى ءماجىلىسىنىڭ دەپۋتاتى، قارجى جانە بيۋدجەت كوميتەتىنىڭ مۇشەسى بولدى دا، 2023 جىلعى ناۋرىزدان باستاپ VIII سايلانعان قازاقستان رەسپۋبليكاسى پارلامەنتى ءماجىلىسىنىڭ دەپۋتاتى بولىپ Respublica پارتياسىنىڭ پارتيالىق ءتىزىمى بويىنشا سايلاندى.
ءماجىلىس مىنبەرىندە بەردەنوۆتىڭ ەسىمى بۋكمەكەرلەرمەن كۇرەس ارقىلى ەستە قالدى. كەيىن ءتىپتى بۇل ماسەلە سوتقا دەيىن جەتتى. ارتىنشا سوت دەپۋتات رۋسلان بەردەنوۆتىڭ ۇستىنەن شاعىمدانعان بۋكمەكەرلىك كەڭسەلەردىڭ تالابىن قاناعاتتاندىرۋدان باس تارتتى. ودان سوڭ ناشاقورلىق پەن ەسىرتكى بيزنەسىنە قارسى كۇرەسكە باعىتتالعان بەس جىلدىق كەشەندى جوسپارعا وزگەرىستەر ەنگىزۋ قاجەت ەكەنىن مالىمدەدى. ءبىر كەزدەرى قتج-عا دا شۇيلىگىپ، كومپانيا قىزمەتىنە الاڭداۋشىلىق ءبىلدىرىپ، سىبايلاس جەمقورلىق تەتىكتەرى جانە ميللياردتاعان شىعىندار تۋرالى ايتتى.
ەكى جىلعا جۋىق دەپۋتاتتىق قىزمەت اتقارعان ول بيىل اقپاندا شىمكەنت قالاسى اكىمىنىڭ ورىنباسارى بولىپ تاعايىندالدى.
بەردەنوۆتىڭ ارتىندا كىم تۇر؟
بۇعان دەيىن ارنالاردىڭ بىرىنە بەرگەن سۇحباتىندا رۋسلان بەردەنوۆ شىمكەنتكە قىزمەت اۋىستىرۋىنىڭ تۇپكى سەبەبى نەدە ەكەنىن ايتقان ەدى.
"شىمكەنتتىڭ اكىمى بولۋ دەگەن امبيسيام جوق. وسى سۇراق الدىڭعى جىلى دا سۇرالعان. ءوزىم شىمكەنتتىكى بولعاننان كەيىن بالكىم سولاي ايتاتىن شىعار. ءبىراق ەشقاشان دا ەشكىمگە ول نارسە تۋرالى ايتپادىم. شىنىمدى ايتسام، ءبارىبىر. ۇلىتاۋعا بارساق تا، بقو-عا بارساق تا، قاي جاققا بارساق تا دۇرىس جۇمىس كورسەتىپ، ناتيجە شىعارۋ -ماقساتىمىز"، - دەدى ول Ulysmedia-عا بەرگەن سۇحباتىندا.
سۇحبات بارىسىندا بەردەنوۆكە "دۇشپاندارىڭىز بار ەكەنىن سەزەسىز بە؟" دەگەن سۇراق قويىلعان.
"ارينە، سەزەمىن. سەبەبى ۇلكەن ماسەلەنى قوزعاعاننان كەيىن ول ماسەلەدە مۇددەلى توپتار بار ەكەنىن بىلەمىن. مۇددەلى توپتار، تۇلعالار بار ەكەن بىلەمىن. ("شىمكەنتتە دە اياقتان شالاتىندار بولماي ما؟" دەگەن ساۋال قويىلدى). جاس بالا ەمەسپىن، بارلىق جەردە مەنى ەشكىم قۇشاق جايىپ كۇتپەيدى. ول كاسىپكەرلىكتە دە سونداي. ەشكىم سەنى قۇشاق جايىپ كۇتىپ وتىرمايدى. كەلىسپەيتىندەر بولادى، قارسى شىعاتىندار بولادى. الىسقا بارمايىقشى، پايعامبارلاردىڭ وزىنە قارسى شىققاندار كوپ بولدى عوي. ءبىز كىمبىز؟ مەن اۋليە ەمەسپىن، ءمىنسىز ادام ەمەسپىن. پايعامبار ەمەسپىن. ول - جۇمىستىڭ ءبىر بولىگى، مەن سولاي قابىلدايمىن. وعان شىداي ءبىلۋ كەرەك"، - دەدى ول.
سونىمەن قاتار، رۋسلان بەردەنوۆ شىمكەنت اكىمى عابيت سىزدىقبەكوۆپەن قاشاننان بەرى تانىس ەكەنىن دە ايتتى.
"قازىرگى شىمكەنتتىڭ اكىمى عابيت مىرزا كەرەمەت جۇمىس ىستەپ جاتىر. شىمكەنت - جەمقورلىقتى توقتاتقان ەڭ ءبىرىنشى قالالاردىڭ ءبىرى. سەنسەڭىز دە، سەنبەسەڭىز دە سول. ...عابيت مىرزانى ومىرىمدە ءۇش رەت كورگەن شىعارمىن. جاناشىر رەتىندە ءارتۇرلى جوبامدى ايتتىم، ەكەۋمىز اقىلداستىق، ول دا جاناشىر. ءۇش رەت كەزدەستىك، ءبىر ساعاتتان وتىرىپ اقىلداستىق. مەن ءوز ويىمدى ايتتىم. ول كىسى "رۋسلان، وسى جوبالاردى جۇزەگە اسىرساڭ، مەن قولىمنان كەلگەن بارلىعىن جاسايمىن، ءوزىڭنىڭ ەلىڭ عوي، كەل دە وسىنى جاسا" دەدى"، - دەيدى ول.
شەنەۋنىك بەردەنوۆ سۇحباتىندا وليگارح قايرات يتەمگەنوۆتىڭ قولداۋىنا قالاي يە بولعانىن دا ايتقان ەدى.
"2018 جىلى سول كىسىگە كومپانيانى ءجۇز پايىز ساتقان بولاتىنبىز. ساتقان كەزدە تانىستىق. مەن اقش-قا كوشتىم. ءۇش-تورت ايدان كەيىن ول كىسى حابارلاسىپ، "شاي ىشەيىك، بىر-ەكى ماسەلە بار" دەدى. بۇكىل جۇمىستى سول كىسىنىڭ ادامدارىنا تاپسىرعانمىن. ول كىسى "وتە قيىن سالا ەكەن، فارماسيەۆتيكا سالاسىندا جۇرگەن ادامدار ءارى قاراي جۇمىس ىستەگەنى دۇرىس سياقتى، ۇسىنىس رەتىندە كەلىسەيىكشى، مەن ءوزىمنىڭ كوماندامدى الامىن، سەن ءوزىڭنىڭ كومانداڭمەن كەلەسىڭ، وسىنى باسقار، مەنىڭ ماقساتىم - وسى سالانى دامىتۋ" دەدى. مەن كەلىستىم. ەشقانداي رۋلاس تا ەمەسپىز. ول كىسى سەمەيدىكى، مەن شىمكەنتتەنمىن. بۇرىن ارالاسىمىز بولماعان"، - دەدى ول سۇحباتىندا.
