Rýslan Berdenov oqiǵa bolǵan kúni qandai kezdesýler ótkizgeni aityldy,- dep habarlaidy Dalanews.kz.
Tengrinews.kz saýalyna bergen jaýabynda Shymkent ákimdigi shabýyl bolǵan kúni Rýslan Berdenov jinalystar ótkizgenin habarlady.
Ákimdik málimetinshe, 21 sáýir Rýslan Berdenov úshin qalypty jumys kúni bolǵan. Kúndiz ol ákimdiktiń apparattyq otyrysyna, sondai-aq, ónerkásip jáne qurylys vitse-ministriniń tóraǵalyǵymen onlain formatta ótken jinalysqa qatysqan. Jumys barysynda qala ákiminiń orynbasary Shymkent qalasy ákimdigine qarasty basqarma basshylarymen birneshe jinalys ótkizgen.
Ákimdik ókilderi Berdenov sol kúni shabýyl jasaǵan adammen kezdesken-kezdespegenin naqtylamaǵan.
"Oqiǵaǵa deiin birneshe kún buryn Rýslan Berdenov jumys jospary boiynsha qaladaǵy qurylys nysandaryn aralap, azamattardy jeke qabyldap, jumys komissiiasymen birge qurylys infraqurylymyn damytý boiynsha birneshe jinalys ótkizdi", - dedi ákimdiktegiler.
Ákimdik mańyndaǵy atys týraly
21 sáýirde Shymkent qalasy ákimdigi ǵimaraty mańynda atys boldy. Saldarynan Rýslan Berdenov jaraqat aldy. Politsiia málimetinshe, kúdikti ustalyp, ýaqytsha ustaý izoliatoryna qamalǵan, bul derek boiynsha qylmystyq is qozǵalǵan.
Al Densaýlyq saqtaý ministrligi málimetinshe, Rýslan Berdenovke operatsiia jasalǵan, ómirine qaýip joq.
"Shymkent qalasy ákiminiń orynbasary oq jaraqatymen qalalyq aýrýhanaǵa tústi. Oǵan shuǵyl operatsiia jasaldy. Operatsiia barysynda qan ketý toqtatyldy, zaqym qalpyna keltirildi. Ómirine qaýip joq", - dep jazylǵan buǵan deiingi habarlamada.
Málimetke súiensek, onyń jaǵdaiy turaqty aýyr dep baǵalanady. Sheneýnik dárigerlerdiń turaqty baqylaýynda jáne qajet meditsinalyq kómekti alyp jatyr.
