Belgili jýrnalist, aqyn jáne prozashy Jumabek Aidarbekuly Tabynbaev dúnieden ótti. Qaraly habardy Qazaqstannyń Mádeniet jáne aqparat ministrligi málimdedi, dep habarlaidy dalanews.kz.
Ministrlik marqumnyń otbasy men jaqyndaryna, áriptesteri men týǵan halqyna kóńil aityp, onyń el rýhaniiaty men buqaralyq aqparat quraldary salasyna sińirgen eńbegin erekshe atap ótti.
Jumabek Tabynbaev eńbek jolyn 1978 jyly bastaǵan. Ol ár jyldary óńirlik jáne respýblikalyq basylymdarda qyzmet etip, otandyq jýrnalistikanyń damýyna eleýli úles qosty.
Qalamger jýrnalistikamen qatar poeziia jáne proza janrlarynda da ónimdi eńbek etti. Onyń «Ómir – kerýen», «Soǵys týraly shyndyq», «Jadymdasyń, jarqyn beine» sekildi kitaptary oqyrmanǵa keńinen tanylyp, joǵary baǵalandy.
Jumabek Tabynbaev Qazaqstan Jýrnalister odaǵy syilyǵynyń laýreaty atanyp, «Aqparat salasynyń úzdigi» ataǵyna ie bolǵan.
«Kásibi biliktiligi, azamattyq ustanymy, adamgershilik bolmysy men ónegeli ǵumyry áriptesteri men keiingi býyn jýrnalister úshin árdaiym úlgi boldy. Ardaqty azamattyń jarqyn beinesi men esimi el jadynda máńgi saqtalady», – delingen ministrlik habarlamasynda.
Ministrlik marqumnyń jatqan jeri jaily, topyraǵy torqa, imany salamat bolsyn dep kóńil aitty.
