Tanymal telejýrnalist, tikelei reportajdyń tarlany Tileýqabyl Myńjasar ómirden ótti. Qaraly habardy "Habar" agenttigi jetkizdi, dep habarlaidy dalanews.kz.
"Belgili telejýrnalist, tikelei reportajdyń tarlany, “Habar aǵa” atanǵan Tileýqabyl Myńjasar dúnieden ozdy", - delingen agenttik habarlamasynda.
Aita keteiik, Tileýqabyl Myńjasar 1952 jyly Túrkistan qalasynda dúniege kelgen. 1975 jyly ál-Farabi atyndaǵy Qazaq ulttyq ýniversitetiniń jýrnalistika fakýltetin támamdaǵan. Eńbek jolyn sol jyly Qazaq televiziiasynyń balalar men jasóspirimder redaktsiiasynda bastap, alǵashqy habary efirge shyqqan.
Ol «Habar» agenttigi qurylǵan kúnnen bastap eńbek etip, 1998 jyldan telearnanyń Almaty oblysyndaǵy menshikti tilshisi qyzmetin atqardy. Qyryq jyldan astam ǵumyryn jýrnalistikaǵa arnaǵan qalamger eldi mekenderdi aralap, qarapaiym halyqtyń tynys-tirshiligin, óńirlerdegi áleýmettik jáne infraqurylymdyq máselelerdi respýblikalyq deńgeide kóterdi.
Tileýqabyl Myńjasar Qazaqstan Jýrnalister odaǵy syilyǵynyń laýreaty, Almaty oblysynyń qurmetti azamaty jáne «Habar» agenttiginiń «Altyn mikrofon» syilyǵynyń iegeri boldy. Sondai-aq ol «Eńbekte úzdik shyqqany úshin» medalimen jáne Qazaqstan Prezidentiniń Alǵys hatymen marapattalǵan.
Marqumnyń otbasy men týǵan-týystaryna qaiǵyryp kóńil aitamyz. Jatqan jeri jaily, topyraǵy torqa bolsyn.
