Premer-ministr Oljas Bektenov Prezident Qasym-Jomart Toqaevqa áleýmettik saladaǵy biýdjet qarajatyn tiimsiz paidalaný jáne jymqyrý derekteri jóninde baiandady, dep habarlaidy Dalanews.kz.
Premer-ministrdiń aitýynsha, memleket barlyq áleýmettik mindettemelerin tolyq oryndap keledi. Alaida áleýmettik tólemderdiń kóptigi, olardyń shashyrańqylyǵy jáne baqylaýdyń jetkiliksizdigi shyǵyndardyń negizsiz ósýine ákelgen. Sonyń saldarynan qarajattyń tiimsiz jumsalýy, tipti kei jaǵdailarda tikelei jymqyrý faktileri oryn alǵan.
Onyń málimetinshe, sońǵy eki jylda ǵana shamamen 288 mlrd teńgeniń tiimsiz jumsalýyna jol berilmegen. Premer áleýmettik sala túbegeili reformany qajet etetinin atap ótti.
Úkimet bul baǵytta birqatar júieli sharalardy qolǵa alǵan. Atap aitqanda, áleýmettik kómektiń bytyrańqy túrleri biriktirilip, biryńǵai júiege keltirilýde. Bilim berý salasynda qyzmet kórsetý úderisteri tolyq tsifrlandyrylyp, bilim nysandaryn salýdan bastap jan basyna qarjylandyrýǵa deiingi tizbek qamtylýda. Sondai-aq Mindetti áleýmettik meditsinalyq saqtandyrý qorynyń jumysy Qarjy ministrliginiń aqparattyq júielerimen biriktirilip, qaita formattalýda.
Bektenov kóshi-qon zańnamasynyń kemshilikteri men keibir immigranttardy áleýmettik qoldaý tetikteriniń álsizdigi masyldyq kóńil-kúidiń qalyptasýyna áser etkenin de atap ótti. Osy jyldan bastap jeńildikter men qoldaý baǵdarlamalary tek eńbek kúshi tapshy óńirlerge qonys aýdarǵan azamattarǵa selektivti túrde usynyla bastady.
Úkimet bilim berý, densaýlyq saqtaý, áleýmettik qorǵaý, mádeniet jáne sport salalaryn keshendi jańǵyrtý arqyly memlekettik biýdjetten jyl saiyn bólinetin shamamen 18 trln teńgeniń tiimdi jumsalýyn qamtamasyz etýdi kózdep otyr. Premerdiń sózinshe, Úkimettiń basty qaǵidaty – «kómek tek shyn muqtaj jandarǵa kórsetilýi tiis».
