Qazaqstan premer-ministri Oljas Bektenov shyǵystarǵa qatań baqylaýdy qamtamasyz etýdi tapsyrdy, dep habarlaidy Dalanews.kz.
«Respýblikalyq biýdjet jobasy men jalpy sipattaǵy transfertter jańa Biýdjet jáne Salyq kodeksterin eskere otyryp qalyptastyryldy. Barlyq memlekettik organdarǵa eldiń áleýmettik-ekonomikalyq damý kórsetkishterine qol jetkizýdi tapsyramyn. Biýdjet qarajatyn barynsha tiimdi ári ýaqytyly paidalaný, sondai-aq shyǵystarǵa qatań baqylaý jasaý mańyzdy», – dep atap ótti Bektenov seisenbi kúni ótken Úkimet otyrysynda.
Qarjy ministrligi men Ulttyq ekonomika ministrligine Úkimet apparatymen birlesip zań jobalaryn 1 qyrkúiekke deiin Parlamentke engizý mindeti qoiyldy.
Premer-ministrdiń aitýynsha, prezident biýdjet teńgerimdiligin, qarjyny respýblikalyq jáne jergilikti deńgeide sapaly josparlaý men bólýdi qamtamasyz etýdi tapsyrǵan.
«Jalpy sipattaǵy transfertterdiń kólemi men 2026-2028 jyldarǵa arnalǵan respýblikalyq biýdjet týraly zań jobalary biýdjettik parametrlerge sáikes qalyptastyryldy jáne memlekettik qarjynyń turaqtylyǵyn qamtamasyz etýdiń eń ońtaily nusqasy bolyp tabylady. Biýdjet teńgerimdi, memleket basshysynyń barlyq strategiialyq bastamalaryn qamtidy. Jalpy sipattaǵy transfertterdiń kólemi óńirlerdiń bazalyq infraqurylymǵa qoljetimdiligin teń dárejede qamtamasyz etedi. Prezidenttiń tapsyrmasyna sáikes, biýdjet áleýmettik baǵyttylyǵyn saqtap otyr. Sonymen qatar, ekonomikalyq ósimdi yntalandyrýǵa baǵyttalǵan shyǵystar kólemi de ulǵaityldy», – dedi Bektenov.
Premer-ministr jańa úshjyldyq biýdjet jobasynyń áleýmettik baǵyttylyǵyna jáne ekonomikalyq ósimdi yntalandyrýǵa jumsalatyn shyǵystar úlesiniń artýyna toqtaldy.
«Prezidenttiń tapsyrmasyna sáikes, biýdjet áleýmettik baǵyttylyǵyn saqtap otyr. Sonymen birge, ekonomikalyq ósimdi yntalandyrýǵa baǵyttalǵan shyǵystar kóbeidi. Biylǵy jylmen salystyrǵanda olardyń úlesi jalpy shyǵystardyń shamamen 11%-ynan (10,9%) 16%-yna (16,1%) deiin ósedi. Buǵan el boiynsha infraqurylymdyq jobalar, biznesti qoldaý men yntalandyrý sharalary kiredi. Bul shyǵystar óńirlerdiń damýyna jáne halyqtyń ómir súrý sapasyn jaqsartýǵa oń áser etedi», – dep basa aitty Oljas Bektenov.
