Premer-mınıstrdiń orynbasary – Ulttyq ekonomıka mınıstri Serik Jumanǵarın Úkimet basshysy Oljas Bektenovtiń BI Group pen BAZIS-A kompanıalaryna nelikten shúılikkenin túsindirdi, dep habarlaıdy Dalanews.kz.
Onyń aıtýynsha, el arasynda “iri kásiporyndarǵa eshkim tıispeıdi, al shaǵyn jáne orta bızneske aýyrtpalyq kóp túsedi” degen pikir qalyptasqan. Osy túsinikti joıý maqsatynda Úkimet basshysy salyqtyq baqylaýǵa alynǵan kompanıalardyń qatarynda iri qurylys kompanıalary da bar ekenin kórsetý úshin olardyń atyn ataǵan.
“Bizde salyqtan bosatylǵan nemese erekshe mártebege ıe kásiporyndar joq. Barlyǵy birdeı zańǵa baǵynady. Sondyqtan Premer-mınıstr BI Group pen BAZIS-A-ny mysal retinde keltirdi. Bul – salyq organdarynyń kúndelikti jumysynyń bir bóligi ǵana”, – dedi Jumanǵarın.
Mınıstrdiń sózinshe, salyq organdary iri bıznes sýbektilerine ǵana emes, barlyq kásipkerge habarlama jiberip, tekseris júrgizedi.
“Ótken jyly salyq komıteti 400 myńnan astam habarlama taratqan. Bul – olardyń turaqty jumysy. Biraq sońǵy ýaqytta Úkimet salyqtyq baqylaýdy kúsheıtpeıdi, tabys kózderin izdemeıdi degen syn kóbeıip ketti. Sol sebepti osy joly keıbir mysaldardy ashyp kórsettik. Buǵan blogerlerge jiberilgen habarlamalar da kiredi. Qazirdiń ózinde 15 bloger óz tabysyn qaıta eseptep, 75 mln teńge salyq tólegen. Qurylys salasyndaǵy alpaýyt kompanıalarǵa da osyndaı talap qoıylyp otyr. Bul – bir ǵana mysal, salyq organdary kóptegen kásipkerlik nysandarymen jumys istep jatyr”, – dep qosty Jumanǵarın.
Eske salaıyq, 28 aqpanda premer-mınıstr Oljas Bektenov vıse-premer-ulttyq ekonomıka mınıstri Serik Jumanǵarınmen jáne qarjy mınıstri Mádı Takıevpen birge jumys keńesin ótkizdi.
Keńeste salyq-búdjet reformasy jáne salyq túsimderin baqylaýdy kúsheıtý máseleleri qaraldy.
Qarjy mınıstri Mádı Takıev júrgizilgen taldaý sheńberinde salyq tóleýshiler shaǵyn kásipkerlikti qoldaý jáne damytý maqsatynda buryn engizilgen arnaıy salyq rejımderin (SRP) paıdalanǵany anyqtalǵanyn baıandady.
"Qarjy mınıstriniń aqparatynan salyq júktemesin ońtaılandyrýdyń ártúrli shemalaryn qoldana otyryp, mindetin adal atqarmaıtyn kásipkerler baryn kórip otyrmyz. Mıllıardtaǵan aınalymmen olar búdjetke ózderiniń tapqan paıdasyna múldem sáıkes kelmeıtin somalardy tóleıdi. Bizde osyndaı iri kompanıalardyń tolyq tizimi bar. Ol tizimde BI Group, BAZIS jáne basqa da kóptegen iri qurylys kompanıasy júr. Ekonomıkanyń basqa salalarynda jumys isteıtin belgili ári tanymal meıramhanalar, fıtnes-klýbtar jáne ártúrli kompanıalar bar. Osy múmkindikti paıdalana otyryp, qazir salyq júktemesin ońtaılandyrýdyń túrli shemalaryn qoldanatyn iri kompanıalardyń ıeleri men basshylaryna qarata aıtqym keledi. Búgin-erteń sizderdiń kompanıalaryńyzǵa salyq organdarynan qosymsha salyq somalaryn tóleý qajettiligi týraly habarlamalar kelip túsedi", - dedi Bektenov.
Oljas Bektenov kásipkerlerden eki apta ishinde salyq organdaryna qosymsha salyq deklarasıalaryn tapsyrýdy jáne shynaıy salyq somasyn tóleýdi surady.
